voor Holten, door Holten

Referendum

Doar is wat of e proat oaver het referendum. Een verdrag met de Oekraine. De geleerd’n gung’n rollebollend oaver de tilleviesiescharm’n. De vuurstemmers wadd’n de zogenaamde intellectueel’n en de tèèg’nstemmers, het volk wat er niks van snapt. Het gung neet oaver Europa, wat nog grötter möt word’n. Tachtig precèènt van het verdrag geet toch à gewoon duur. Brussel trekt zich toch niks an, van wat Nederlàànd dut. Het merendeel van de politiek is ter vuur, dus zal het wà good weer. Het gewone volk wördt duur mekaar e schudt en as ne zooltzak an de kàànte zet. In 2005 was ter een referendum oaver de Europese grôôndwet. De Nederlàànders kwamm’n massaal op en stemm’n massaal tèèg’n. (61,5%) De politiek stemm’n vuur en noe tien joar later zitte wiej met hèèl völle gebakk’n peer’n. Hoe völle geeld is ter wà neet e pôômpt in làànd’n as Griek’nlàànd en Pool’n. Loaw we de rest mà neet veerder neum’n. Alle daag’n kan het volk het lèèz’n in de kràànte. Europa hef ter zô völle armood biej an e haalt det het làànd’n, diet alles redelijk op de riege hadd’n, klauwen met geeld kost. De vergriezende Nederlàànders, diet nog wat oaver hebt e spoart, vuur ’n ôôld’n dag, meugt er belasting oaver betaal’n. In Frankfort zit de bankiers kèèr op kèèr de rèènte te verlèèg’n, um het leen’n mà zô gunstig mèugelijk te maak’n. Nog èèm’n en ie möt as spoarder rèènte betaal’n oaver oen spoargeeld. Het is neet verwôônderlijk det de Nederlàànders noe wier tèèg’n e stemt hebt tèèg’n det verdrag met Oekraine. (61,1%) Wat dut de politiek? Zie wadd’n der wier vuur. Jan met de pette hef ter gen verstàànd van. En noe? Wat geet er gebuur’n, de hààndremme der op? Zie wringt zich in alle buchte. Is det noe democratie? Hen stemm’n goan, de meerderheid haal’n en dan gewoon doon wat ne minderheid van het volk wil. Nee, het was àllèène mà roadgèèvend. Oaver een joar mag e wiej wier hen stemm’n. Mà woer op? Is het gek det hèèle volksstamm’n zegt van, zeukt het mar uut. Ie kômt er kàànt van in de warre. In de noagesprekk’n, ie wèèt wà, op de verjeuirdaag’n, blik det tèèg’nstàànders het in één kèèr met mekaar eens bint. Wat is ter an de hàànd? Noe loat de Panama-papier’n ôôns wier zeen hoet het grôôt kapitaal te warke geet. Het is neet verwôônderlijk det de grôôte massa doar van oaver de nekke geet. As de politiek nog een betje vertrouw’n trugge wil winn’n möt ze is een kèèr kômm’n met stààndpunt’n diet duudelijk bint en woet ze zich an hôôlt. Ie krigt zô gangswieze het geveul daw we an het ofzakk’n bint. Vuur iedereene diet in dit làànd lèèft, möt er ne plaatse weer, toch bint er grèènz’n. Doar zal de politiek vuur mönn’n stoa, det is neet makkelijk, mà het ôôle sprekwoord zeg neet vuur niks, zachte hèèlméisters maakt stink’nde wôônd’n. Wis en waarachtig.
De Vèèrkàànte Viefkop.

Reacties zijn gesloten.