voor Holten, door Holten

Hèèmoa kloar met

Vaake hôôl ie oe in. Ie dèènkt, het zal wà. Mà zô gangswieze biej’ bezörgd oaver de toekomst van disse speele op den grôôten aardklôôt. Ie magt det neet weer, want vuur dàj’ der arg in hebt, biej’ een racist. Het geouwehoer begint ieder joar opniejs, met Zwarte Piet. Volgens bepaalde groep’n in ôôns làànd dut het dèènk’n an de slavernij. Zelf hè k, as kind, Zwarte Piet nôôit zô e zeene. Het was meer ne keerl um deepe ontzag vuur te hemm’n. Mien vaa hef miej nôôit e zeg det het mar een slaafje was. Vermoedelijk heur ik biej de categorie, lèège op e leid, want vuur det er, in Amsterdam, zich een paar drôk umme maak’n, hà ‘k ter nog nôôit van e heurt. Vuur miej is Sunterkloas een kinderfees en heurt biej ôônze volkskultuur. Netuurlijk, wiej könt ôônz’n Zwart’n Piet een niej klèèdje an doon, mà veerder is het klip en kloar; Zwarte Piet möt bliem’n. Het is van de gekke det er pertiën in Den Haag bint diet er oaver noa dèènkt. Zie vindt det Koningsdag neet vuur àmoal is. Hier in dit làànd mag det. Àj’ in Turkije hard op zegt dàj neet vuur Erdogan bint, wördt oe de môônd e snoert. Zie vindt det naam’n as Michiel de Ruyter en Piet Heyn uut het stroatbeeld weg möt, umdet ze in eur ôôg’n neet dèugt. Vedreetig woj’ der van, mà het mag àmoa in dit làànneke. Het wördt tied det iedere politieke pertieje is ne kèèr ne grèènze dörft te stell’n, zôdet de lèèg geletterden en de superknappe köppe zich doar wier in könt vind’n. Ne grèènze diet noar de verkiezing’n ôk hard wordt e maakt. Netuurlijk wiej bint het er oaver eens daw we bleute, diet huus en heerd möt verloat’n, möt bliem’n help’n, mà det wil nog neet zegg’n daw we ôônze lèèm’nswieze möt anpass’n. Ôk de nieje bewonners könt zich anpass’n. Wat det betreft bin ‘k het hèèmoal eens met Kees van der Staay. Alle uuting’n van religieus lawaai, hôôl ie binn’n oene eeg’n gelèufsgemeenschap. Doar hooft hèèl Nederlàànd neet ongewild van met te geniet’n. Ãj’de gelèuvigen op wilt roop’n um noar de karke of de moskee te goan, dan luuj’ in dit làànd de klokke, zô as det de gewoonte is. Det is dan misschien een pries, diej’ möt betaal’n, vuur de vriejhèid en de gastvriejhèid van dit làànd. Ie lèèst toch met gekromde tèène det Imams duur Turkije wordt op e leidt en betaald. Det kan, zôônder doar ellenlange discussies oaver te hôôld’n, toch ôk in Nederlàànd? Het is an de politiek um doar wat an te doon. Zô gangswieze biw we hèèmoal kloar met het papp’n en nathôôld’n. Lèu, diet in eur eeg’n làànd gen vriejhèid hadd’n, könt hier zegg’n wat ze wilt, mà het is an de politiek um grèènz’n te stell’n. Loaw we hopp’n det ze det doot, zôdet ôôns vertrouw’n wier wat greuit, wis en waarachtig.
De Vèèrkàànte Viefkop.

WAARDEER JE DIT ARTIKEL?

Deel dit artikel dan met je vrienden!
Wanneer je actief deelt zul je dit bericht minder vaak zien!
close-link