Getje en Sara

Van de wekke heiw we in de kràànte könn’n lèèz’n over de gruwelijkheed’n uut ’n tweed’n wereldoorlog, biej het hengoan van de Battumse Leny Polak, in de lèèftied van 99 joar. Zie hef ôôns het angriepende book “Leny’s Lèavens” noa eloat’n. Gelukkig, want de gruwelijkheed’n uut den oorlog meugt neet word’n vergett’n. Doarumme is het zô môôi det er noe ne spölfilm is emaakt oaver de gebuurteniss’n uut die tied in disse regio. Ne film van Get Jan Oplaat (De Weuste) uut Markel diet à jaor’nlàànk de belang’n vuursteet van de Canadeese veteraan’n. Met ongeveer 140 man an vriejwilligers bint ze der an begunn’n. Vanalles kump ter in vuur, oorlog, vervolging, bruut geweeld, ôônderduukers, verzet, verroad en herdèènk’n. Moand’nlàànk bint er opnames emaakt, ôôndermeer in Markel, Deep’n, Verwoolde en op ’n Canadeez’n Karkhof in Hoolt’n. Wiej hebt het van dichtebiej met meug’n maak’n en dan vuural Getje (Ruben Haverslag), één van de hoofdrolspöllers. Hij wèèt, ondàànks zien geestelijke beparking, het jödse mèike Sarah te redd’n uut de klauw’n van de Duutsers. Zie oaverlèèft de oorlog en hooft gelukkig de verschrikking’n van Leny Polak neet te ôôndergoan. Dreihonderdvieftig gast’n en vriejwilligers zagg’n de spöllers oaver de rôôie lôôper goan. In ne grôôte witte limousine kwamm’n ze, ôônder grôôte belangstelling van de regionale pers, an biej de Haverkamp in Markel. De filmpremiere was indrukwekkend môôi, duur de muziek en het plak- en knipwark van het productieteam. De mèèst’n van de touschouwers kekk’n met troan’n in de ôôg’n. De film löt het lèèm’n zeen van ne Markelse boer’nfemilie in ’n oorlog en de dramatische gebuurteniss’n in 1944, met ne razzia biej de k(a)arke in M(a)arkel. Het löt de bevrijding zeen en de begrafnisse van Getje in 1949. Veerder de herdenking en het keerskes bràànd’n op Karsoamd in Hoolt’n op ’n Canadeez’n karkhof. Zelfs de hoornbloazers ontbrekt neet in disse rolprèènte. In ‘n oorlog oordeelt mèèns’n à gauw oaver good en verkèèrd. Vaake blik het an ’t èine van ’t leedje, toch net èèm’n ààns te weer. Het grôôte verdreet kump duudelijk noar vuur’n. Historische gebuurteniss’n wordt noa espölt. Een uur en drei kwattèèr vlug vuurbiej. Inmiddels trekt de film veerder de regio duur. Doar kump een ondertiteling biej in het Nederlàànds en het Engels, want ôk in Canada zal “Mirrewinter op het Plattelàànd” bekekk’n word’n. Gelukkig hoove wiej doar neet hèèmoal hen, want ôk in Diekerhook is e in oktober te zeen. Dan kan de rôôie loper uut vuur Getje en vaa en moo Haverslag. Zie bint er ôk, vuur en achter de het scharm’n, merakels drôk met ewes. At iedereene in de regio diss’n film hef bekekk’n, zölt Getje en Sarah een begrip weer. Disse jonge mèèns’n zölt de bosschôp van het neet vergett’n eur veerdere lèèm’n met zich met drèèg’n en duur gèèm’n an volgende generaties.

Reacties zijn gesloten.

Deze website gebruikt cookies om uw ervaring te verbeteren. AccepteerLees meer