voor Holten, door Holten

Gefilstèèrt en vedan mà wier

0

Ofgelôôp’n zoaterdag was het wà ne hèèl’n drôkk’n dag en det geeld’n neet vuur ôôns allèène. ‘N hèèl’n Diekerhook, Lôô en Splôô was zun betje uut e leup’n noar Het bôônte Peerd. Det had netuurlijk ne hèèle speciaale reed’n. Aaldrik en Fenny van ’t Bôônte Peerd wadd’n viem’ntwintig joar e trouwt en det woll’n ze neet ongemarkt vuurbiej loat’n goan. Nôh det is good e lukt. Zie hadd’n bes wat volk op de kökk’n. En het möt e zeg word’n, het was ter merakels gezellig. Zie hebt is wier loat’n zeen, det ze ôôlderwets goeie gastgèèvers bint. Nog wier gefilstèèrt en bedàànkt en netuurlijk kômme wiej wier, àj’ de vèèrtig te pakk’n hebt. Noadet ’n hèèl’n Diekerhook zô’n betje biej Aaldrik en Fenny op de brulfte wadd’n e wes, môs de helfte, noa oflôôp, zô vedan noar de Poppe, op uutnèudiging van Prins Andréé uut ’n Diekerhook. De prins wol netuurlijk neet achterbliem’n en leut biej Kèunedarp lacht nog eens good zeen, det de Fienpreuvers ôk uut een good vaatje könt tapp’n, het buutreednersvaatje. Het wörd’n ne merakelsen môôi’n oamd met ne machtigen môôi’n Kèunedarper van het joar. Mark Tuutert. Aj’ Olympisch kampioen wordt, dan wördt het tied daj’ eindelijk anschoeft in det riegje van al die bezundere Kèunedarpers. Gefilstèèrt, dubbel en elf moal dwars verdeent.  Zôônder Gradje Boemel te kort te doon, gôh, wat is den keerl good, möw we toch extra bliej weer met het optreed’n van de Bastaards, Jan Deijk en Bert Reilink. Wat wadd’n die bèire jonge keerls good. Zie hebt loat’n zeen det er binn’n de carnaval wier ne bult an talent rôônd löp. Zie hadd’n ech e oefent, ôk het slotversje gaf de lèu de kriebels op de rugge. Zie hebt de latte vuur het Prinsenbal hierduur wal extra hôôge leg. Jongens gefilstèèrt en vuur de lèu diet het e mist hebt, volg’nd joar zölt ze der ongetwiefeld wier biej weer. Tja, wie möw we dan nog meer filstèèr’n? Bjorn Rustebiel? Met zien nieje café? Of zôl e der toch ne geraniumkweekerieje van maak’n? Wie wacht het of, misschien kan hij ’t ôk wà wier verhuur’n, doar is toch gen mèinse diet er noar umme kik. Wat het ôk wördt, in ieder geval gefilstèèrt en völle succes. Eigenlijk kan ‘k iedereene filstèèr’n. Wiej meugt binn’nkort wier hen stemm’n. Het lik zô gewoon, mar ie zeet, woet ze der in ààndere làànd’n vuur möt knokk’n.  Dus nemt astebleef de meuite um den gàànk noar de stembusse wier te maak’n. Loat astebleef zeen, woej’ met de Provinciale verkiezingen vuur stoat. Gèèft een signaal of, oj’ het met ’n gàànk van zaak’n  eens bint of neet.  Het is belangrieker as dàj’ arg in hebt. Kiekt mar is trugge noar den uutslag van de gemeenteroadsverkiezing. As hèèl Hoolt’n toen hen stemm’n was e goane was ter nen ààndern uutslag e wes. Zet het in ’n agenda, begin meert, stemm’n vuur de provinciale staat’n. Wis en waarachtig.

De Vèèrkàànte Viefkop.          

Laat een antwoord achter

Uw e-mailadres wordt niet gepubliceerd.