voor Holten, door Holten

Achtbaane

Hèinig wörd’n wiej donderdagoamd op e trökk’n en dan, met ne rotvaart noar beneed’n. Het was ter vol in het gemeentehuus, mà het is de mèuiste plaatse um de slöttels van Kèunedarp te krieg’n van de börgemèister. Gauw nog èèm’n noar ‘n Schöppert um de waag’ns te bekiek’n. Vuur de leste kèèr doar, het hèèle spul geet verhuuz’n. Joar’nlàànk wörd’n der de waag’ns trechte maakt. Altied wille, met dàànk an de bewonners. Zô duukeln wiej noar de vriejdag. Half nèènge appèl, alle school’n langs. Onmeunig gezellig vuur de wichter. Jammer dat die ééne schoole nog neet met dut. Begriep’n doo ‘k het misschien wà, mà die kinder hebt toch ôk rech op een feesje. Wiej lèèft in 2016 met ne Blauwwitt’n prins vuuran in ‘n optoch. Mèister, touw e gèèm’n, in ôônze schooltied gôôi’n wiej mekaar met schnèèball’n, mà noe biw we de beste kammereui. Nog gekker. Één kèèr in de wekke haal ik biej oe de kleine jonge op en biej ‘m bin ‘k neet e wes. Mèister krabt oe is een kèèr achter de oor’n en loat zeen det Hoolt’n ôk hier ééne gemeenschap is. Vriejdag, ne lang’n dag met ‘s oamds het rondje langs de lèu diet wat goods hebt e doane vuur Kèunedarp. Zôônder arg leup’n de huuze vol biej Yvonne Los, de Nölle junior, Snell’nbarg en Boertje Ismo te Veele. De beer was hèèmoal lös toen de vuurzitter van de feescommissie in Splôô, Brààndheultje Beldman, wörd’n oavervall’n met ne medaille. Hij môch spöll’n op zien eeg’n feesje. Biej het waag’nbouwersfees ofheuik’n want ’n ààndern dag à wier vrog in töuw vuur den grôôt’n optoch. Ie zeet hoe good ôj’op möt pass’n, want vuur daj’ der arg in hebt haal ie ongevroagd het lààndelijke niejs. Môôie waag’ns met eindelijk wier ne Hoolter winnaar. De mèuiste groep, met de terechte publiekspries, Bèusebarg. De lèu hebt genött’n. Oaverà in het darp klunk de carnavals- en öllievaat’nmuziek duur tut in de kleine uurtjes. Op tied stopp’n, want ’n ààndern dag op noar Hèèt’n, um denzelfden optoch nog een kèèr te jurèèr’n en dan de busse noar Hoolt’n miss’n. Moandagmiddag, met mekaa op de Wippert an, um in bootjes oaver de Schipbekke te goan. Ne hôôp volk was ter kiek’n en ôk die bint àmoal in de boot e nömm’n. Duur weer en völle wind kwam de dapper’n um half zesse biej de “boerderij” binn’nvall’n. Het was e lukt en dan met ne grôôte busse vol volk op Battum an. Het was ter gezellig en völle van ôôns, ôôndermeer Ab van Boer Biet hebt tante Riekie meug’n kuss’n. Vuur daw we op Kèunedarp angung’n heiw we toch nog èem’n biej Jootje e wes. In huus kump de achtbaane tut stilstàànd, het zit er wier op. Het lèèm’n van alledag geet wier duur. Ie möt er van hôôld’n, mà het is môôi, aj’ al die jonge lèu zô zeet geniet’n. Zô ’t ze in optoch à zèèd’n, dinsdagoamd 12.00 uur, Prins Youry, eindstation, Waterloo. Wis en waarachtig.
De Vèèrkàànte Viefkop.

Reacties zijn gesloten.