voor Holten, door Holten

Hardlôôpers

0

Zoaterdag heij’ het könn’n zeen. Wie wörd’n der kampioen van Hoolt’n, juus Pim ten Brinke en woer traint den, juus biej de Hoolter Korhaan’n. Det is biej de Korhaan’n good te mark’n. Sinds det den keerl met zingk, geet alles völle sneller. Wat de Korhaan’n vandaag an’ dag op het repertoire hebt stoan, lug ter neet umme. Pas mar is op met de Kèunefeest’n. Halléluja. Ie zölt zeen det ôk de ôôle haan’n der rapper van wordt. Noe zegt ze wal is, hardlôôpers bint dôôdlôôpers, mà die joar’n bint ze duur. Hardlôôpers bint van alle tied’n. Nemt noe Fanny Blankers-Koen, wiej bint er met op e greuit, mar ôk in Hoolt’n leup’n der hardlôôpers rôônd. In mien ôôg’n wadd’n ’t à hèèl gauw hardlôôpers, mà det lèè an miej. ‘N allerèèrst’n dent miej de hakk’n leut zeen op het trapveeldje an de Bèusebargerweg, biej Kieft’nbeelt, was Haaz’npoot. Met de beste wille van de wereld kôn ‘k ‘m neet an lôôp’n. Ôk AKV lek hèèl snel at e de balle langs oe hen scheuif, de kop in de nekke gôôi’n en as ne stroaljager langs oe hen vleuig. Hij gung mangs zô hard det e de balle à in hat e haalt vuur det e wier noar beneed’n kek. ‘N àànder vuurbeeld was Klaas, flitsend op de èèrste vief meter. Ôôit leupe tèèg’n ne Duuts’n tèèg’nstàànder de honderd meter zô hard, dat den ’t noar drei meter al opgaf. Doarneuis haj’ netuurlijk de ech’n, zôônder wie dan ôk te kort te will’n doon, Harwich en Snorrewind. Mà die hardlôôpers hadd’n netuurlijk altied angèèvers nèurig en juus die angèèvers bezörgt ôôns disse wekke het verhaal. Normaal bint ze neet altied èèm’n snel en bekiekt ze alles röstig. Van de wekke vleuig’n ze langs miej hen. ’n Ontvanger vuurop, in de lange bokse, met de hàànne op ’t stuur en vlak ter neuis,in voll’n gàànk, ’n Dekker, krom e beuig’n oaver de fietse. Zwaai’n kon der nog net of, mà zie hadd’n gen tied um te proat’n. Volgens miej bint ze à wier in training vuur de triatlon van volgend joar. Het völ miej nog neet tèèg’n, zô ’t ze der nog oaver hen trapp’n. Het lôôp’n kon nog wal is minder weer, mà zie hebt nog een hèèl joar te goan. Noe mà hopp’n det ze neet wordt uut e lot. Nen ech’n Hoolter kampioen hardlôôper was toch wà Frits Kramer. Doar is ’t met begunn’n, ne voetballer was ’t neet, mà hij had onmeunig völle konditie. Hij was altied net iets eerder biej de balle of oaver de strèèpe. Is hij dan de vaa van de triatlon van tèèg’nswoorig? Ie könt ’t oe ofvroag’n. Hij is wà de man diet de èèrste stap noar Rome zett’n, op weg van Hattric noar de atteletiekvereniging in Hoolt’n en de triatlon. ‘N cirkel is rôônd, Frits scoord’n in ziene joar’n ne hattric. Pim ten Brinke, gefilstèèrt, op noar de drei kèèr. Wis en waarachtig.

De Vèèrkàànte Viefkop.

Laat een antwoord achter

Uw e-mailadres wordt niet gepubliceerd.