Duurhouw’n, den knup

Het duuzelt oe an alle kàànt’n, àj’ de bedraag’n lèèst, diet er wier noar Griek’nlàànd goat. Een normaal mèènse, zelfs Rutte kan der met de pette neet meer biej. Griek’nlàànd krig ter wier dikke tachtig miljard biej. Het is good daw we die arme bleute doar een betje helpt. An de ààndere kàànte wördt het hôôge tied det ze zich is an de rèègels hôôlt. Doar bint er te völle diet er de kantjes vanof lôôpt. Zie scheeld wal op Duutslàànd, mà die drèègt eur possie in al die lening’n dubbel en dwars biej. De vuurwaard’n woerôônder det geeld wördt e gèèm’n, bint keihard, mà det was ôk à zô, allèène zie lapp’n al die vuurwaard’n an de lèèrze. Vuurige wekke hebt de Griek’n de hulpe nog of e wèèz’n. De schèuld leup in een sneltreintempo op. Snap ie ’t nog? Noe bint ze der uut. Het möt allèène nog èèm’n duuur al die tweede kamers, Griek’nlàànd vuurop. Lèu diet ôôns vuurige wekke nog uutscheuld’n vuur rotte vis, kriegt noe van ôôns, ôônder nog strakkere vuurwaard’n, wier ne zak met geeld. Noe möt het good kômm’n. Noe hôôlt ze zich an de rèègels. Het veuilt moeilijk te gelèum’n. Hoe kan det noe, ne regering, diet advisèèrt um neet akkoord te goan, geet noe zelf duur de kneene vuur de harde Euro’s. En in ôôns eeg’n làànd? Wat möw we met die keerls uut de politiek. Zie kroamt er vanals uut um stemm’n binn’n te haal’n en binn’n de kortste kèèr’n sloat ze umme as ’n blad an ’n bôôm. Normaal gesprökk’n zôl der in Griek’nlàànd noe wier een referendum mött’n kômm’n, mà ja, det woagt ze neet wier. Het water steet eur an de lipp’n. Het mèeste det miej opvöl, wadd’n de woord’n van ne gewoon’n Griek. Met ne grijns op zien gezichte zeer e “Loaw we oaver’n half joar mar is wier kiek’n.” Hij kon nog wal is geliek krieg’n. Het geeld wördt binn’n e haalt. De druk geet wat meer van ’n kettel, de verààndering’n lôôpt vertraging op en het spölleke begint van niejs of an. Wat gebuurt er in ôôns làànd? Ne hôôp gelul in de tweede kamer. Lèu, diet zich in alle buchte wringt um van het ongeliek, geliek te maak’n. Lèu diet uutrekk’nt det het ôôns al een dikke duuzend Euro de man hef e kost. Lèu diet vindt det de Griek’n völs te hard wordt an e pakt. Lèu diet schreeuwt, daw we uut Europa möt. Doar kump àmoa niks van op ’n klos. Het wördt hôôge tied det er noe èèrs wat e doane wördt in Griek’nlàànd, vuurdet er ôk mà ne cèènt hen geet. Zachte hèèlmèisters maakt stink’nde wôônd’n. Zie loat allèène de gewone man blaauw’n, mà het wördt tied det ôk al det grôôt kapitaal, met al det geeld in ’t buut’nlàànd, is good wördt an e sprökk’n. Het wördt tied det ze den knup doar is ôôlderwets duurhouwt, wis en waarachtig.
De Vèèrkàànte Viefkop.