Het zet oe an an ‘t dèènk’n. Ofgelôôp’n wekke haw we ne femiliereünie. Zô raak’n wiej verzeild op ne kolossaal grôôte Iesselboerderieje. Ôôit bint vuuroolders doar begunn’n as boer, met honderd bunder grôônd, um te ontginn’n. Zie wark’n zich letterlijk en figuurlijk uut de klei. Noe, honderdvieftig joar later, boert er gen eene meer van. Zô zat e wiej biej mekaa en kwamme in gesprek met eene, net as ikke, van de kôôle kàànte. Biej hem was det hèèl duudelijk te zeen. Arg niejsgierig noar zien verhaal, vertell’n e miej det e het geluk had ehad, um ôôit, via een uutwisselingsprogramma, te meug’n studèèr’n in Wagening’n. Noar zien studie gunge trugge noar Tsjaad um zien kennis doar in praktijk te breng’n. Duur oorlog en narighèid kwam e uutèindelijk, as vluchteling, trugge in ôôns kikkerläänneke an de zèè. Inmiddels à meer dan twintig joar in e börgert, as partner van ne noazaat uut die ôôle boer’nfemilie. Op mien vroage woet e zich noe veul’n in het Nederlàànd van teèng’nswoorig, kwam een verrassend verhaal. “Och àj’ oe een betje an anpast, köj’hier machtig môôi lèèm’n. Àllèène de leste joar’n veul ik miej meer en meer gediscriminèèrd”. Ik schrökke der van, mar het verhaal nam ne verrassenden drèèi, toen ‘t blek det e zich meer gediscriminèèrd veul’n duur ààndere buutenlààndse groep’n, met hun eeg’n gelèuve, diet noar ôôns gastvrieje làànd wadd’n ekömm’n. Hij schetst’n miej een verhaal van oaverheersers en samenlèèvers in het veere Afrika. Hij vertell’n det Europa de saam’nlèèving in Afrika deen’n te help’n, zô det ze het doar àmoa better krèèg’n. De angst van oaverheersing duur religies kwamm’n in zien verhaal duudelijk noar vuur’n. Het breg ôôns biej de verkiezing’n in Europa. Grôôte verschoeving’n, links en rechts op de stembiljett’n. Ne gröttere opkomst. De lèu rèurt zich. In Nederlàànd leut PvdA-er Timmermans duudelijk heur’n wat e wol. Ziene pertieje stun in één kèèr wier op de kaarte. Veerder zeej’ de versnippering in Europa touwnemm’n. Doar is wark an de winkel. Het vingertje uutstekk’n noar bepaalde làànd’n is te gekôôp. Met mekaa wark’n an de toekomst is ne langen moeilijken weg. Kiekt mar is good um oen hen, hoe of ter is estemd. De kôôle kàànte, terecht, is nen uutspraak diet gen recht dut. Zôônder de kôôle kàànte is ter gen lèèm’n meer. Wie zölt het met mekaa mönn’n doon, mar ie magt netuurlijk vuur oe zelf opkômm’n, zôlange het mà neet geet um de mach.
De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.
