Natuurlijk geet det vuur de Road van elme op de zoaterdag neet op, mà sommigen van de euldere generatie zatt’n op dôônderdagoamd al wà met gestrekte beentjes op het oh zô gezellige terras. De allereuldst’n raakt’n op de zoaterdag verzeild in het ôôle gemeentehuus, woer de börgemèister met zien gevolg, zich opmaakt’n, um de optocht vuurbiej te zeen trekk’n. Het brach miej trugge noar de joar’n zèumtig, toen Börgemèister Enklaar hier de èèrste Prins’n van de Fienpreuvers op het bordes touwsprök. De held’n van toen, wiej schrieft 1977, Prins Lucien, alaaf en een rondje van de Graaf. Nog altied kump die spreuk met de carnaval nog noar boam’n. Hoolt’n wörd’n vuur het èèrste Keunedarp eneumt. Henny van Huub hef de naam bedach. Doarduur is ter in Hoolt’n nen echte “Keunecultus” ontstoane. Klèine Hermänneke, in narrenpak, drukk’n de Börgemèister een ech Keun in de hàànne. Zôll’n ze van boam’n met ôôns metkiek’n? Vaste wà. Waterjan met de Canadeese whisky vuur de börgemèister. Wat zölt ze schik hemm’n met mekaa. Die gedacht’n gung der duur miej hen, toen wiej in de ôôldheidkamer wörd’n ontvang’n in de Börgemeisterskamer. Joa heur, Hoflàànd op ’n börgemèistersstool. Het leste niejs wörd’n duur e nömm’n. Het schient det er biej hôôge uutzunderingr toch nog een plein, ne stroate of een plantsoen noar Börgemèister Enklaar wördt eneumt. Dubbel en dwars verdeend. Meerdere Hoolter hebt eur beste doane um det vuur mekaar te krieg’n. Wiej hebt nog wal èèm’n gedeuld. Wat zôl het môôi wèèr. Wat miej betreft meugt er nog wà meer van zukke mèèns’n beneumd word’n. Het dut rech an de geschiedenis van ôôns darp. Netuurlijk kwamm’n de “Keune op n Beelt” ôk nog an bod. Doar stoat alle wekke zo volle lèu biej te kiek’n, zôônder det ze könt lèèz’n woerumme of ze zo belangriek bint ewes vuur Keunedarp. Ie zeet, doar is nog genog te doon vuur het nieje college. Het nieje college, möw we der gelukkig met wèèr? De Hoolter pertieje, met twei zetels winst, zit er neet in. Àj’ de Heer’n uut de politiek heurt kuiern, hebt ze àmoal eur eeg’n verhaal. Ze hebt àmoa geliek. Woar is, daw we gen ne Hoolter wethoolder meer hebt. Gelukkig nog wà ne wethoolder met Hoolter blood en doar zöw we ’t met mönn’n doon. Ôôndertuss’n trek de optocht duur Hoolt’n. Prins Buisman zut nog èèm’n volop mèugelijkheed’n. De lèu geniet op de terrass’n. Inmiddels is het feest vuurbiej. Hoolt’n maakt zich op vuur de jubileumprins van Keunedarp. Viem’nvieftig joar carnaval in Hoolt’n, det hadd’n ze in 1968 nôôit verwacht. Begunn’n met een man of twintig, uut egreuit noar ne vereniging met meer dan 800 leden. Vermeuid? Nog lange neet!
De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.
