Trugge noar 2013. Karmse in’t Darp. Met de klèèdwaag’n köj’ oe boam’n noar ’n Barg loat’n rie, um èèm’n weg te drèum’n in de tied van de joar’n vieftig. Geniet’n van de röste. De rogge völt, ôônder het geweeld van den zich. Met de pik wördt ze netjes opzied eleg. De bindsters komt er achter an um de garv’n te bind’n en an schôôm’n te zett’n. Een eineke veerder zet ne boer de hàànd an de ploog en het roggelàànd kluurt wier zwart. Het geet neet altied good. Het blif mèèns’nwark. Een peerd brekt uut de anspanning. Iets te völle drôkte. Gelukkig löp het good of. Met al die indrukk’n goat de lèu wierumme noar de karmse um nog te geniet’n van ne consumptie of een ijsje. Hoe ààns is het dit joar. Wat hebbe wiej àmoal al neet vuur de kiez’n ehad. Ie wordt er neet vrolijker van. Èèrs half meert, alles op slot, duur nen enge zeekte diet er an zit te kômm’n. Links en rechts valt er lèu weg. Vuural de euldere generatie zit in de risico groep. Wekkenlàànk bint ze vôt uut het stroatbeeld. In de verpleeghuuze meugt ze neet meer word’n bezocht. Drama’s achter de geslött’n duur’n. De mèèns’n in de zörg warkt zich ne slag in de rôôndte. Het hèèle làànd klapt zich de hàànne blauw. Iedereene vindt det ze bes wat meer meugt verdeen’n. Miljoen’n euro’s van ôôns belastinggeeld vleegt links en rechts uut de schatkiste. De mèèns’n verget rap. In Amerika kump vuur de zôvölste kèèr nen Afro-Amerikaan umme, duur buut’nspoorig plietsiegeweeld. De vlamme slöt in de panne en demonstraties golft oaver de wereld. Net in de tied van de àànderhalve meter wordt de rèègels neet altied juust op evolgt. Vol ongelèuf kiek ie der noa. De verwiet’n vleegt oaver en wier oaver den beeldbuis. Programma’s wordt e boycot. De geschiedenis möt op de schuppe. Wat is de oplössing met de verkiezing’n vuur de duure? Ie hôôlt oen harte vaste. Nederlàànd is het mèèst racistische làànd wat er is, ne banaan’nrepubliek en toch lèèft wiej hier met al die nationaliteit’n biej mekaa. Ie môgg’n hier alles zegg’n, mà det hoom’n neet. Noe möj’ oppass’n en oene woord’n wèèg’n op ‘n schaaltje. Woenneer dooj’ het good? Loaw we hopp’n daw we gauw wier könt kiek’n en geniet’n van die ôôle ambacht’n. Loaw we hopp’n det alles good kump.
De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.
