• Leven in Holten
  • Contact
  • Leven in Holten
  • Contact

Sportdag

20
GEDEELD

Vuur miej uut fietst een paar jongs. Zie goat neet zô hard, gelukkig mà. In een paar trapp’n bin ‘k ter langs. “Goei’ndag”, mar doar kump gen geluud van de ààndere kàànte. Det is ôk neet verwôônderlijk, bèire bint ze drôk met de telefoon. Zie heurt en zeet neet wat er um eur hen gebuurt. Ie könt het ze neet kwoalijk nemm’n, het is de nieje tied. Op schoole, ôônderweg en tut ’s oamds laate zit ze te koekeloer’n en te äpp’n op die computertjes. Met de gedachte, det het völle better zôl wèèr um an sport te doon, vleegt miene gedacht’n trugge. Zôl het nog bestoan? Sportdag? Nee det zal wà neet, ààns ha ‘k de kleintjes à wà biej miej ehad met het diploma.

“Uutkiek’n biej de Poorte”, was de terechte road van mooders. Een lèèmsgeveuirlijk punt, ôônderweg noar het Sportdal, àj’ biej Köllink oaverstökk’n. Ie mônn’n wà drei, vèèr kèèr kiek’n en dan nog kon der nen auto met ne rotgàànk, vanof Dèèmter ôônder de Poorte hen scheet’n. As ter ééne oaver de weg was, gaf e de ààndern anwiezing’n. Gelukkig is het altied good egoane. Sportdag vandaage. Het A-diploma heiw we al op zak. Wekk’n làànk is ter e oefent um te kiek’n of diploma B haalbaar is. Gôôi’n met ne tennisballe, zestig meter hardlôôp’n en veerspring’n. Wiej wadd’n à nat bezwèèt aw we, met ne scharp’n bôch, ôônder de Poorte duur, het pad noar het Sportdal op raceden. Vanof de hèugte sprunge wiej à van de fietse um ôôns biej de mèister te meld’n. Den vertell’n oe fijntjes dàj’ de fietse netjes tèèg’n de hegge an mösss’n zett’n. Dan krèèg ie oen kaartje met de verschillende onderdeel’n um de nekke en môs ie wacht’n tut dàj’ an de buurte wadd’n. Vol bewôôndering kek ie noar de grôôte jongs, diet den bal wal een dikke zestig meter oaver de voetbalwèire gôôi’n. Zie gung’n à vuur diploma E. Achter op het sportdal, biej den springbak zag ie ze veer oaver de vèèr meter spring’n. Gelukkig hoom’n ie zelf nog neet zô veer vuur oen B-diploma. Àj’ zeet dàj’ biej het spring’n drei meter twintig hebt ehaalt, wèèj’ dàj’ het B diploma in de tässe hebt. Tied vuur een glas ranja en dan tikkertje duur de bèume van het sportdal. Wat ne môôie stèè en wat onmeunig völle vrieje tied hebbe wiej doar duur ebrach. Ontelbaar, de pötjes voetbal op het achterste veeldje. Ne goal van twei jässe en dan tweie tèèg’n tweie, gele trui. Ie heurt het neet meer. Jammer, het zôl good weer at de jong’n meer bewèèging krèèg’n, in plaatse van al det gekoekeloer op de scharmkes.

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.