• Leven in Holten
  • Contact
  • Leven in Holten
  • Contact

Het vliegende evangelie

0
GEDEELD

Zoaterdagoamd zat e wiej te geniet’n vuur de Diekerhookse Mölle. Wat een decor en wat een wark. Zie hebt er in ‘n Diekerhook wier wat môôis van e maakt. Ãj’ der oaver met wilt proat’n, möj’ der hen, um te kiek’n noar, “Ne zommer vol kluur.” Heb ie wal is nen helligen dôômie e zeene? Nôh, dôômie Rôôz’nbôôm steuif met nen helligen kop vôt, op de fietse, langs de mölle, Zien’n biebel steuitern met ôônder de snelbinders. Hij was hèèmoal van trabat, toent e in de gaat’n krèèg, det zien heilige woord der neet meer in gung, as in nen oolderling. Met ne rotgàànk stèuve op Hoolt’n an. Het dèu miej dèènk’n an den ôôld’n dôômie Israel, den in de zestiger joar’n ôk op de bromfietse duur Hoolt’n vleuig. Zie neum’n um à rap, het vliegende evangelie. Nog gevèuirlijker was Jan Gijzenboer. Den kek hèèmoal näns noar. Klaag’n oaver, hoe drôk of e wà neet was en de tied verlull’n. Op’t lest’n vleuig e zô hard vuurbiej, det zien’n trekker um hoaste neet meer biej heul. Lèèm’nsgeveuirlijk, doar zölt mà schoolwichter oaverstekk’n. ’N ààndern männ’n hè ‘k, net as ’n dôômie, de fietse pakt en bin hèinig an op Hoolt’n an e trapt. Biej de Poppe rechduur en zô kwam ik biej ’n Markelsen Optoch. Sjonge jonge wat een wark hadd’n ze der doar van e maakt. Moeilijk vuur de jury, mà môôi vuur het volk. Twei en half uur làànk trökk’n de waag’ns duur Markel. Vief rieg’n dikke stun het volk te kiek’n in de Grôôtestroate en as dàànk krèèg’n ze mie toch ne bujje rèèg’n op de pette. Gelukkig heul’n ze toen net pauze in ’n optoch. Ja pauze, det doot ze speciaal vuur de muzikàànt’n. Volgend joar zà ‘k is heur’n of det noe is um det ze zô’n dörs hebt of umdet ze ’t ààns neet vol könt hôôl’n. Zelf hè ‘k ‘t prima vol e heul’n. Op huus an, biej de Poppe rechduur, dach ik, zunne pauze is zô gek nog neet. Èèm’n noar binn’n hen en wie tref ik doar? Het echtpaar Vincent-Nijland, 60 joar e trouwt, ie wèèt wà den ôôld’n buschauffeur van de Oad, 86 joar ôôld. Hij is Hoolt’n à joar’n uut, mà nog hèèmoal in vuur een feesje. De börgemèister, ’n dôômie en HMV wadd’n der neet en doarumme heb ik ze mà filstèèrt. Ja, zestig joar e lèèdne kwam börgemèister Enklaar biej de echtpaar’n op visite en het “vliegende evangelie” kwam namens ’n kark’nroad, achteran. Ik heb het vuur oe op e zoch op, Erfgoed Rijssen-Holten\Picturae Krantenviewer. Zestig joar e lèèdne, wat is de tied verààndert. Toen nog Hoolter lèu in klederdrach, keerls in t zwarte pak en vroole met ne knipmusse op. De tied vlug, miene fietse ôk en zô wà ‘k net op tied vuur Studio sport wier op de kökk’n. Twente wier neet e wunn’n en Ajax verleuirne, al met al een môôi weekend, wis en waarachtig.
De Vèèrkàànte Viefkop.

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.