• Evenementen
  • Webcam
  • Evenementen
  • Webcam

Trouweriej’n en nog völle meer

Van de wekke zag ie op het medium feesboek, ne foto van de ôôle Binn’nstroate. Ne dag later stun ik doar te kiek’n biej Egbers vuur de duure en môsse deepe grèèm’n um det ôôle in miene gedach’n te krieg’n. De kleine winkelroete van de schouwmaker, het smalle klinkerweggetje, met an de rechter kàànte het boer’nhuuske van Malo en Spier, met doarneuist de onttakelde “Jödd’nkarke”. Doar vuurbiej, ôk wier twei achterhuuze. Zo lôôp ie duur langs Kôôpman, um uutèindelijk uut te komm’n an de grôôte stroate. Pal vuur het gemeentehuus. De börgemèister kump ter net an op de fietse en èèm’n later zeej’ ’m, dààmp’nd achter de roet’n in de Börgemèisterskamer. Det ôôle gemeentehuus woet zô völle Hoolter de trapp’n opgung’n vuur een niej begin in eur lèèm’n. Àj’ de fotobeuke noa kiekt zeej’ de klassieke plaatjes vuurbiej kômm’n. De tied van gemeentehuus lig veer achter ôôns, mà doar kan nog altied etrouwd word’n. Gelukkig hef det ôôle gemeentehuus ne machtig môôie bestemming ekrèèg’n as “Oudheidkamer”. Mà det neet allèene, vuur vanalles köj’ der trechte. Zô trapt de de carnavallisten doar op de dôônderdagoamd of, biej het begin van eur joarlijkse feesje. De börgemèister zit dan boam’n in de roadzaal um het carnavalsvolk binn’n te loat’n. Beneed’n stoat ze kloar, de Fienpreuvers, zô’n zestig man stark, jong en ôôld nog duur mekaar hen. Mà dan geet de fluite van de veeldwachter en de euldst’n, de Senaat, woerôônder een paar eerbiedwaardige griez’n, scheidt zich of en ôônder feestelijke bloasmuziek wordt ze de Roadszaal binn’n ebloaz’n. Det herhaalt zich nog een kèèr, biej de volgende groep, de Raad van State. Het zaaltje löp al aarig vol. Dan komt de feestvierders noar boam’n, de Road van Elme, jonge keerls, super fit nog, sommigen vuur de èèrste keer. Met hèèl Kèunedarp viert carnaval, wordt ze duur de Brààndheultjes noar binn’n ehaalt. Noe is het wacht’n op de Prins en Adjudant en dan nèeimp de Börgemèister het woord. Wat kan den man trouwens merakels good zing’n. Kedootjes wordt uut ewisselt en de börgemèister wördt vuur vèèr daage beneumt tut Opperkeun. Netuurlijk is ter wier volop genött’n van de saucijzenbrèudjes en uuteindelijk kômt Prins Shadow en adjudant Hazelnoot, met de slöttel van de gemeente noar buut’n. Het gemeentehuus in Riess’n kan dichte. De Fienpreuvers regèèrt. Vuur alle Keunedarpers een geneuglijk carnaval. Wiej zeet mekaa zoaterdag biej de optocht of biej een gezellig drankje. Een oold Prins zèè heel vrogger à, met mekaa, duur mekaa en vuur mekaa.

De Vèèrkàànte Viefkop

De Vèèrkàànte Viefkop

Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp. ,,Ik schop en geef complimentjes. Een columnist verkondigt een bepaalde mening en de lezers kunnen zelf bepalen wat ze er mee doen. Soms herkennen mensen zich er in. Enkele verhalen kunnen ze niet met droge ogen lezen, is mij verteld.''

Gerelateerde artikelen

Volgende

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Meer nieuws

Welkom terug!

Log hieronder in op je account

Maak een nieuw account aan

Vul onderstaande gegevens in voor je account

Achterhaal je wachtwoord

Geef je gebruikersnaam of email adres in om je wachtwoord te resetten.