• Evenementen
  • Webcam
  • Evenementen
  • Webcam

As ik die ôôle plaatjes zee

Iedern zundag kump ter een stukske herinnering langs op het Feesboek. Van ’n Bosch dut machtig môôi wark. Ôôld’n, mar ôk hèèl völle jongern geniet er van. Het stroatbeeld uut de joarn vieftig. Het winkeltje van Van Leeuw’n, hoe vaake heiw we der gen stukske zeut hoolt of een piepke laurierdröp ekoch. Het blieft de beeld’n uut oene jeugd diet op het netvlies stoat ebrààndt. Ie zeet het ôôle stroatbeeld, met keerls op de fietse, in boezeroen met manchesterse bokse, vroole met kinder en ne boer’nkoare. De ôôle schoole met ziene lange kaale gänge en de stinkende wc. De wichter stoat biej het hekke te kiek’n en wacht tut det de belle wier geet. Deerntjes diet met ne natt’n vinger ne letter op den herinneringstèègel anmarkt. De ààndern möt dan roa, woer det plekske zit. Die gedacht’n heiw we àmoa te dàànk’n an die man, diet ôôns alle zundaag’n löt zeen hoe of Hoolt’n was. De tied vlug. De allerkleinst’n belèèft vandaage den èèrsten schooldag. Loat het astebleef ne môôi’n dag wèèr, want ie verget het van oe lèèm’n làànk neet meer. Het zit vuurgood vaste in het kindergehèug’n. ’N dèird’n dag in schoole bliem’n!. Linkshàànnig zat ie de drei’n verkèèrd umme. Zô verdeetig, goa der nôôit meer hen. Vaa op hôôge peute noar het hoofd van de schoole, det was mà vieftig meter lôôp’n. Met ne môôie kluurplaate wörd’n ie der toch wier hen ebrach. In schoole bliem’n was ter neet meer biej. Nee, wiej hadd’n gen rugzakjes, wiej gung op klumpkes met ne leer’n binn’nschouw. Die klumpkes stunn’n netjes in de riege op ’n gàànk en op leer’n binn’nscheuntjes kwam ie de klassse in. Het was ter neet zô kluurig as vandaage an ’n dag. Àllèène de strikke in de heure van mèikes hadd’n de mèèst môôie kluur’n. Trugge noar de foto’s. Ôk biej Ter Harmsel kwamme wiej vaake in de winkel vuur een brôôdrèuster of wat dan ôk. Zô gangswieze met de tied kwamm’n de verààndering’n. Vuur ôôle ôôg’n meer as vuur jongern. De tied tikt vedan. De vakàànties zit er zo good as op. Van die nieje zeekte biw we zo te zeen nog lange neet of. Blieft vuurzichtig vuur oe zelf, mar ôk vuur ààndern. Het dorre hoolt raakt ôk zôônder disse zeekte wal het èèrste op. Geniet van de daagelijkse dinge, van de môôie ôôle plaatjes en netuurlijk van HoltensNieuws.nl

De Vèèrkàànte Viefkop

De Vèèrkàànte Viefkop

Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp. ,,Ik schop en geef complimentjes. Een columnist verkondigt een bepaalde mening en de lezers kunnen zelf bepalen wat ze er mee doen. Soms herkennen mensen zich er in. Enkele verhalen kunnen ze niet met droge ogen lezen, is mij verteld.''

Gerelateerde artikelen

Volgende
Geef een reactie

Welkom terug!

Log hieronder in op je account

Maak een nieuw account aan

Vul onderstaande gegevens in voor je account

Achterhaal je wachtwoord

Geef je gebruikersnaam of email adres in om je wachtwoord te resetten.