voor Holten, door Holten

De Viefkop hef promotie e maakt

0

De Viefkop is e snèuvelt. Hij was en is vuur ne Hoolterkràànte en vindt det Jan en alleman doar an met möt help’n. Doar dach’n ze biej de kràànte ààns oaver en dus môs e snèuveln. Snèuveln vuur de Hoolter Kràànte en drei wekke later wier opstaon bie Hooltens Niejs is het lekkere geveul wa ‘k ter van oaver hôôle. Noa vèèr joar, zô van de één op de ààndere wekke, einde verhaal. Neet good genog meer. Het dèu zeer. Ik vreuge miej of, woerumme? Begriep’n doo ‘k ’t neet, mà het is neet ààns. Hoolt’ns Niejsblad stopt, mà de Vèèrkàànte Viefkop lèèft en geet vedan. Het dèu miej good, dè ‘k de ofgelôôp’n joar’n, iedre wekke van verschill’nde kàànt’n heur’n, det ze de verhaal’n good, minder good en môôi vunn’. Det hef miej der tut e brach um Hoolt’ns Niejs te beneuidern, met de vroage of zie het duur woll’n doo. Zie vunn’ het een good plan en zô was ‘t gauw beklunk’n. Dus doarumme vanof december, de Vèèrkàànte Viefkop op Hoolt’ns niejs. De Vèèrkàànte Viefkop blif in Sallàànd met verhaal’n oaver vrogger, noe en nog wat. Het geet neet altied um geliek hemm’n of krieg’n. Het geet ter völle meer umme um de lèu wakker te maak’n, an ’t schriem’n of an ’t dèènk’n zett’n. Zo, det was det. Noe möw we met zien all’n mar is zeen, dew we de bôch duur komt. Doar steet wier vanalles vuur de duure. Het is niks ààns as drôkte, drôkte, drôkte. Mà beste mèèns’n doot mà hèinig an, want wiej hebt àmoa teglieke niejoar. Geniet van de warmte binn’ in disse duustre daag’n. Zörgt ter vuur, daj’tut röste kômt. Kiekt hoe môôi greun of den karsbôôm is. Lustert is hoe zuuver of den midwinterhoorn klinkt. Kiekt op karsoamd good um ’t huus hen. Gèèft Derk met ’n beer gen kààns. Geniet van de worste pannekooke, de môôie rôôie karsball’n. Maakt oe neet te sappel. Het geet zô as ’t geet en het geet altied ààns as daj’ dèènkt. Op Ôolejoarsoamd möw we de narigheid achter ôôns loat’n. Het goeie nemme wiej in gedach’n met noar 2010. Tweiduuz’ndtiene, het joar van de gemeenteroadsverkiezing’n. Wier minder Hoolter in de road? Nog mar èèn’ Hoolter liestrekker. Geet het de verkèèrde kàànte op? Nôh ja, aj’ der van oavertuugt bint det de kàànte van Riess’n het beste is vuur Hoolt’n, dan zitte wiej good. Woer möw we toch op stemm’n. Miej maakt het neet uut woej’ op stemt, aj’ mà wà goat. Wis en waarachtig. De Vèèrkàànte Viefkop.  

WAARDEER JE DIT ARTIKEL?

Deel dit artikel dan met je vrienden!
Wanneer je actief deelt zul je dit bericht minder vaak zien!
close-link