Ne dôônderslag biej helderen hemel. Alles daverd’n op zien grôôndvest’n. Wat noe? Hèèmoa niks. In alle provincies begun het formèèr’n. Inmiddels bint alle nieje staat’nleed’n beëdigd en goat de gekèuzenen an ’t wark. Heldere taal en Den Haag? Ne hôôp gezèèmel, zie proat wà, mà zegt niks. Nee, zie möt bliem’n zitt’n, wiej hebt gen ààndere kèuze. Is ter paniek? Het lik ter op, vuur de tweede kèèr, à wier beroad met vèèr pertiën diet èigelijk neet veerder wilt of könt. Woerumme, bint ze bange vuur ’t làànd of vuur de eeg’n zeteltjes? Vuur de tweede kamer kiest de lèu toch ààns às vuur de Provincie. Nôh dan, wèèst dan duudelijk en loat de kiezers bepaal’n wat vunne kàànte of ’t uut möt. Bliem’n proat’n met zàànd in de môônd hef gen zin. Wiej zölt met zien all’n kluur mönn’n bekenn’n en dan wier vedan. De puppekes invull’n, de mouw’n opstrèup’n en duudelijkhèid verschaff’n. De tied van papp’n en nathôôld’n is vuurbiej. Juus noe, in disse onzekere tied’n begint de regering te schoem’n. Noe wilt ze èindelijk wat goan doon an al die zaak’n diet eur kàànt in ’n knup bint eleup’n. Waarachtig dezelfd’n diet an de knöppe hebt ezett’n. Al die tied hef dit Landje rechts estemt en bint wiej oaver links regèèrt. Van te vuur’n wörd’n der al pertiën uut e slött’n, zôônder ôk mar één woord te wisseln. Noet, biej de leste verkiezing de wind in één kèèr vanuut ’t Ôôst’n kump en de zeteltjes duur de lôch hen dwarrelt, bint ze lam eslaag’n en zegt ze nog niks. Wie hef doar belang biej? Het is te gek vuur woord’n, de lèu diet èèrs nog sprökk’n van trippel B, goat noe biej die éénmansfractie langs um de zaak dôôd te knuffel’n. Zie proat met mekaa, mà woeroaver? Ôôndertuss’n nemt de otters, de dass’n en de wolv’n het làànd oaver. De moeflons bint àmoal à dôôd e bett’n en noe bint de scheuipe alle wekke an de buurte. In het dichtstbevolkte làànd van praktisch de hèèle wereld, zölt er oaver een joar of wat nog völle meer wolv’n rôôndlôôp’n. Woenneer zölt biej ôôns, an ’n voot van den Hoolterbarg, de èèrste slachtoffers vall’n. Àw we der niks tèèg’n doot, kump den dag van ’t èèrste kind dichter en dichter biej. Möt det èèrs gebuur’n vuurdet ôôns de döppe lös goat? Het slacht’n van vèè vergliek’n met het verschuurn van scheuipe geet alle park’n te buut’n. Vuurdàj’ de wolv’n an de vegetarische gehakball’n hebt, löp ter gen ree meer op ’n Hoolterbarg. Nee, wiej hebt gen krisus, mà wördt er wà regeert? En wat is arger?
De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.
