Op noar het volgende feest

Hoolter, wiej könt het er röstig van nemm’n. Van de wekke lèèz’n ie in de kràànte daw we in de gekèupste gemeente van Sallàànd en Oaveriessel wont. Doar stun eerlijke Twèènte, mar een betje sjoemeln mag. De Gemeente heult geeld oaver, mà völle zöj’ der neet van mark’n, want de börgemèister waarschouwt, zuunig an met oaverdoad. Loat goan, möt ze in Splôô hemm’n e dag, want in diezelfde kràànte lèèz’n ie det de Splôôder, per man, per dag, zô ongeveer drei en’n halm’n liter bier achteroaver hebt e sloane. Vuur drei daag’n kump det op op een dikkte tien liter de man. Het kan hoaste neet ààns of doar möt noe lèu weer diet met een tankwaag’ntje duur Splôô riedt, want zie hadd’n de minste toilett’n en det begriep ik wà, zie hôôlt in Splôô neet van gezeik. De schoole mag dan weg weer, het Splôôse geveul is nog altied springlèèvend. Ciefers vanuut Hoolt’n hè’k neet e heurt, zie stunn’n neet in de kràànte. Ie könt oe ôk ofvroag’n woerumme of noe de Hoolter karmse en en het Splôôse feest teglieke wordt e heul’n. In Splôô was ter niks van te mark’n. De revue zat wier op zien ôôle nivo en op zoaterdagmänn’n trök ôôndermeer ne kouw, hèèl àllèène, duur de Splôôse weid’ns. Zundagmiddag was ‘t gezellig drôk en iedereene dèu dapper met um het gemiddelde op te schroem’n. Ankommenden zoaterdag en zundag steet het Bèusebargse feest op het programma. Het is de jongste lotte an de bôôm met tèèntfeest’n, mà doarumme neet minder. Loat er oe èèm’n zeen, want doar bint zôvölle bekèènd’n, èèm’n weg van de snelweg, èèm’n lekker ouwhoer’n met mekaa. Vriejdagoamd de revue, zoaterdag middag, het bekèènde buurttournooi. Zie hebt een duurlôôpend programma, zelfs ôônder melkenstied van half zesse tut half zèume, de Vèèrkàànte Viefkop. Zôl der dan nog volk weer? Zie sluut of met een grôôt feest, van Nix en ààndere bèkèènde lokaale muziekgroep’n. In Diekerhook scheurt er de leste wekk’n ne geschilderden auto langs de wèèg’n. As det good geet, geet er meer good. Den löt ôôns wèèt’n det het Diekerhookse feest er an kump. Het Diekerhookse feest met netuurlijk Kroep in op zoaterdag en op zundag, de Nathälze, hèèmoal uut Amerika. Een paar wekke gedeuld, dan könt de Diekerhookers het gemiddelde van de Splôôder wier opkrikk’n. Zo riegt de feest’n zich anééne. De echte leefhebbers wèèt det het feestseizoen nog mà pas begint. Wat dèènk van het Markelse feest, met zien machtigen optoch, de Loarnse en de Battumse karmse en doar tuss’nduur nog ôônze eeg’n Keunefeest’n. Het kan hoaste neet ààns of doar lôôpt eind september allèène nog mar alcoholist’n rôônd in Oaveriessel. Alle gekhèid op een stökske, drinkt nôôit te völle en um met ôônzen börgemèister te sprekk’n, een glèèske op, loat oe rie, al is het ôk met de kruuwaag’n. Ik hop oe te zeen, blieft geniet’n, want zie könt oe zô de grôôte löchte uutdrèèi’n, wis en waarachtig.
De Vèèrkàànte Viefkop

Reacties zijn gesloten.

Deze website gebruikt cookies om uw ervaring te verbeteren. AccepteerLees meer