voor Holten, door Holten

Nôôit e schött’n is altied mis

0

’S mäns um tien uur stun loco börgemèister Stegeman, compleet met kett’n, mà völs te vrog, in de startblukke um het nieje ôônderkômm’n van de scheetclub in Hoolt’n te openen. Één van ziene leste klusjes, want nog een paar wekke en dan zwaait e of. Ôk wethoolder Lech’nbarg geet met pensioen.Wethoolder ter Keurst möt 99 precèènt zeker het veeld ruum’n, mà zal de tweiköppige fractie van de PvdA bliem’n anvoer’n. Het was disse wekk’n een tied van ofschèid nemm’n en welkom heet’n in het Riessense gemeentehuus. Ie zagg’n ofwisselend, lachende en huulende gezicht’n. Mà ja, zô geet het in de politiek. De huulende gezicht’n wörd’n bedàànkt en krèèg’n een lintje. De lachende gezicht’n wörd’n beëdigd en begint an een niej chapiter, woet ze völle tied in goat stekk’n en det lange neet altied het dàànkbaarste wark is. Toch verààndert er hèing an wat in ôônze gemeente. Vèèr joar gelèèdne vöch’n ze mekaa nog de tèènte uut, biej de vorming van het college. Gelukkig geet het disse kèèr, zô ’t zich löt anzeen, een stuk better. Met twei wethoolders uut Riess’n (Wolterink en Beens) en tweie uut Hoolt’n (Aanstoot en Cornelissen), kan Hoolt’n wier ne beste pertieje metbloaz’n. Duur al disse verààndering blif àllèène wethôôlder Wolterink zitt’n. Doar geet in één kèèr ne hôôp bestuurlijke kennis verleuirne. Loaw we hopp’n det de nieje wethoolders disse leuigte gauw könt opvull’n.Vuur de lèu diet het neet e haalt hebt is ter ééne goeie road, duurgoan, want nôôit wier e schött’n is altied mis. Det geeld’n dus ôk vuur ôônz’n locobörgemèister. ’S middags krèèg e ne tweede kààns. Vuurzitter Overmeen vertell’n ôôns det ze al in 1952 wadd’n begunn’n met scheet’n. De smid van de Kol, Herman Klein Velderman, Freek van de Sluuter en de barbier, Jehan van Geenhuuz’n wadd’n de oprichters en èèrste schutters. Kastelein Wim ten Berge, van hotel Holterman, bedach de naam “De Eendracht” en doar schöt het hen. Via Amicitia, Vosman en de Koepel bint ze op 29 meert 2014 neer e strekk’n, in het machtig môôie complex, op het Vletgoa. Op diss’n dag krèèg Stèègeman dus twei kààns’n en die tweede kààns was good raak. Noadet de beire jongste leed’n, Sil en Dillen, ne pijl en boog hadd’n an e reikt, schöt Stèègeman met een welgericht schot, vanof nen halm’n meter, in één kèèr, ’n appel biej Willem Tell van ’t hèufd of en was de scheetclub e opent “Met vereende kracht’n tuss’n de Eendracht en het gemeentebestuur is ter iets môôis van e maakt”, zô wadd’n de leste wèure van Stèègeman biej zien’n openingswoord. Het nieje clublokaal kon in gebruuk word’n e nömm’n. Het volk stroom’n noar binn’n, um te zeen hoe ’t ewörd’n was. Môôi is ‘t en doar wörd’n der een paar op e drunk’n. Op 12 april köj ’t àmoal nog wier bekiek’n, want dan hebt ze oop’n huus. Ik road oe an um te goan want, nôôit e schött’n is altied mis, wis en waarachtig.
De Vèèrkàànte Viefkop.

Laat een antwoord achter

Uw e-mailadres wordt niet gepubliceerd.