voor Holten, door Holten

Komkommers, tweie vuur nèèngzèumtig cèènt

0

Gelukkig, zie bint wier an ‘t wark op ‘n Beelt. Vanmänn’ hè ‘k de auto der à vrog e stalt op de zèum’ntwintigste plaatse. Ja, wiej wadd’n der vrog biej. C 1000 had de komkommers in de aanbieding en zô te zeen had hèèl Hoolt’n det e zeene. Dè’s ôk gen wôônder, het stun met grôôte letters achterop de Hoolter Kràànte. Ie konn’n good mark’n dat det e lèèz’n was en zô heurt het ôk. Het dut good det ter ôôndernemmers bint diet in de gaat’n hebt, det nen adverteèntie in disse kràànte gen windeier oplèèvert. Het veult good det ter wier ne Hoolter supermarkt achter op ôônze kràànte steet. Doar wördt advertèèrt, twei komkommers vuur nèèng’nzèumtig cèènt en binn’ de kortste kèèr’n steet ‘n Beelt vol met auto’s. Mà ja, het is ôk bienoa vuur niks. Àmoa met nen nôôdgàànk duur ‘n gàànk van de Aldi op noar C-duuzend. Tsonge jonge wat een drôkte doar biej de komkommers. Zie wadd’n neet an te slepp’n. Noar ‘n dik half uur stunne wiej wier buut’n met twei komkommers vuur nèèng’nzèumtig cèènt en ne tasse vol bosschôpp’n. Het zal miej beniej’n woenneer of Albert Heijn en de Aldi de komkommers vuur twei kwartjes in de Hoolter kràànte hebt stoa. Noe zöj’ oe wal ofvroag’n, wat möt den viefkop noe met komkommers. Nôh det zà’k oe vetell’n. Sinds nen moand of wat doo’k met an det Frankensteindieet en ik kan oe vertell’n, ik beginne der al aardig op te liek’n. Komkommers hôôlt miej doar biej in de beene. Zie smaakt merakels, mar ie möt ze lekker dunne schnie met de kèèz’nschaave. Neet van die die dikke stukk’n, zô ze wal is kriegt op ne visite. Nee, langs de schaave, twei leppels olijföllie en vèèr leppels azien, een betje smallook der biej met wat baslicum en kloar is kees. Het is good vol te hôôld’n. Àllèène, noe met al die tèèntfeest’n is ‘t wà kwakkeln. Waj’ in de wekke ofvalt, kriej’der in ‘t weekend wier biej. Het blif kwakkeln, mà doarvuur is het dan ôk komkommertied. Het blif ôk kwakkeln met de korhaan’. Doar is gen geeld meer um ze nog te redd’n. Det is ôk neet nèurig. Die redt zich zelf wà. Zundag bint ze te bewôôndern in Grave. Goat ter hen kiek’n. Det wördt een grôôt zangfees en ie hebt de garààntie daj’ ze ôk ech zeet en heurt. In disse tied van bezuuniging’n, köj’ het neet stoande hôôld’n um mà geeld te bliem’n gôôi’n in ne boademlôôze putte. Det geeldt ôk vuur meer zaak’n woer we völs te veer in duur bint e schött’n. De krukk’n en de rollators uut’ pakket, det bedèènkt ze, hoe is ‘t mèuglijk! Det bint dinge, doar vrög gen mèènse uut vrieje wille umme. Det bint noe net de dinge woet de geeldgraaiers vanof möt bliem’n.

Komkommertied, bezuunigen, mà neet oaver de rugge van ôôle en zeeke lèu. Wis en waarachtig neet.

De Vèèrkàànte Viefkop.
 

WAARDEER JE DIT ARTIKEL?

Deel dit artikel dan met je vrienden!
Wanneer je actief deelt zul je dit bericht minder vaak zien!
close-link