• Leven in Holten
  • Contact
  • Leven in Holten
  • Contact

Ie wordt er zô mèu van

5
GEDEELD

Doellôôs zit ie te kiek’n, wachtend op ààndere tied’n. À de tweede verjeuirdag in coronatied, hoe lange nog? Alle daag’n liekt op mekaa, gen visite, gen verjeuirdag, gen feesje, neet kaart’n, neet voetball’n en goat zô mà duur. Lekker èèm’n noa de kroeg. Nee heur, wal koppels volk in de plantsoen’n, as haring’n in ne tonne. Uut verveling pak ie de auto en riedt mar is een kèèr duur het darp. Doar wôj’ ôk à neet vrolijker van. De oamdklokke, hoe lange sluut ze ôôns nog op. Wanneer màj’ noe eindelijk is een kèèr wier een biertje drink’n op een terras. Dan besef ie dàj’ neet meugt klaag’n. Iedere moand steet oen geeld wier op de rekkening. Doar bint mèèns’n diet völle hardere klapp’n um de oor’n kriegt. De horeca, al acht moand gen inkomst’n. Jonge lèu, diet in de mèuiste tied van eur lèèm’n biej vaa en moo op de kökk’n möt bliem’n. Studèènt’n diet neet meer wèèt wat een studèènt’nlèèm’n is. Netuurlijk, de zörg steet ôônder druk, mà wat dooj’ aj’ oen bedrief noar de knopp’n zeet goan. Wat dooj’ àj’ zeet dat de starfteciefers neet boam’n normaal bint. Gen wôônder det de lèu balsturig wordt. Ie wordt woest àj’ zeet det Nederlààndse èèntstof noar het buut’nlàànd geet. Wie bedäch zukke dinge. Wie simpele lèu snapt det neet, zô as zô völle wat er in Den Haag wördt bedisseld. Engelàànd dut het better as Europa. Hoe zô saam’n stark. Minister Hugo de Jonge löt het geloat’n oaver zich hen kômm’n. Wat e ôk dut, hij kan het nôôit good doon. Zelfs mevrouw Kaag môs eur’n köttel intrekk’n, vuur wat betreft de oamdklokke. Den Haag, hoe lange zôl ‘t nog duur’n, vuurdet ze een niej kabinet hebt? Investèèrt ze ôôns uut de krisus, of geet het slot wier op de schatkiste. Het is neet te bevatt’n, miljarden en miljarden bint er uut egèèm’n, um ôôns làànd stoande te hôôld’n. De Grönningers hebt nog altied de schadevergoeding van het gas neet binn’n. Grôôte bedriem’n hebt miljoenen belastinggeeld ekrèèg’n en kèèrt vervolgens winst uut an andeelhouders. Neet te gelèum’n. Netuurlijk zölt er wà wier àmoa verkloaring’n vuur wean, mà het klopt neet. Wakker word’n en trugge loat’n betaal’n en neet straks de gewone man der vuur loat’n opdrèèi’n. Maakt oe neet zô drôk, heur j’ zegg’n. Ja àmoal makkelijk proat’n, as ’t oe neet in de knippe treft. Mà dan nog, het möt rap ààns word’n, mà of het ôôit wier röstig wordt? Vuur noe geeldt, èènt’n, eent’n, èènt’n. Kalm bliem’n, mar ie wordt er zo gangswieze wal onmeunig mèu van.

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.