• Leven in Holten
  • Contact
  • Leven in Holten
  • Contact

Harm oet Riessen

3
GEDEELD

Wie kend’n Harm noe neet. Oaverà in Hoolt’n-Riess’n en veer doar buut’n leut e zich heur’n en zeen. Àj’m één kèèr e zeene hadd’n blèève oe op ’t netvlies zitt’n. Zô vergung ’t miej ôk. In de joar’n zestig zatte wiej op ne zundagmiddag op het terras biej Popp’n Bets in Markel. Ééne toafel veerder zat Harm met ziene meuige. Zien’ banjo hat e biej zich en hij zat het hèèle terras op’n kop, met het versje, Jenske, Jenske wol zô geerne vriej’n , iedern dag nen ààndern en iedern dag ne niej’n. Het is miej biej e blèèm’n. Later krèeg’k nog wal is verhaal’n te heur’n oaver Harm, umdet miej brèur ne blauw’n moandag verkèèring had met ne schôônzuster van Harm. Toen, begin joar’n zèumtig, de Riesner Revue niej blood krèèg in e pôômpt, was hij à rap één van de belangrieke gezich’n en ziene sterre stèèg met de joar’n, tut grôôte hèugte. In die tied hat Hoolt’n nog niks met Riess’n en ie könt oe ofvroag’n of alle Riesner wat met Harm hadd’n. Het was de tied, det de SGP de èèrste en de eenige vioole spöll’n in het Riessense. Harm kwam zô of en touw wal is noar Hoolt’n. Netuurlijk, met zien ploegie van RV, um een bälleke met ôôns te trapp’n. Ôk biej de carnaval hef e meerdere kèèr’n vuurstelling’n e gèèm’n vuur jong en ôôld en biej de èèrste Kèunefees dèur hij de presentatie biej ’n Twèènts’n oamd. Wiej pleug’n ‘m wal is, det e ne Riesner was. Hij wörd’n der neet ààns van. Hij blèèf ne Riesner en doar was e grèuts op. Hij vöch vuur nen eereplaatse vuur Belcampo. Hij gung der vuur. Het zôl môôi weer, Belcampo en Harm in het gemeentehuus. De leste kèèr, dà ‘k ‘m in Hoolt’n zagge presentèèr’n, was met het èèrste grôôte fees van de Hoolter Korhaan’n. Zien typetje, met banjo en brôôdtässe, hèw we nog helder vuur de ôôg’n. Één kèèr kwam ik ‘m tèèg’n biej RTV Oost, toen ‘k uut e nèudigt was biej het programma Aksent, van Moniek Sleierink. Hij was gangs met zien programma Harms Farms en tuss’n de bedriem’n duur kwam e èèm’n biej proat’n. Hij heul neet van schijnheiligheid en det leut e good mark’n in het wekkelijks schriem’n in ziene kràànte. Gewoon, môôie verhaal’n oaver gewoone lèu, woet de humor neet an ontbrök. Biej het uutkômm’n van mien book krèèg ik de eere um te word’n e neumt in zien’n column. Noe is ’t neet zôô, daw we mekaa noe hèèl good kenn’n, ik kenn’n ‘m better, dan hij miej. Zô zal ’t vuur völle lèu weer’n e wes. Vuur ’n good half joar trugge heur’n wiej det e die verschrikkelijke zeekte had. Harm blèèf ter onmeunig nuchter ôônder. Het raak’n ôôns deepe. Dôônderdag 17 februari is e hen e goane, ’n bekèèndst’n Riesner van Hoolt’n is uut de tied. Harm, röst in vrèè, hard hôôld’n en nat hôôld’n, wis en waarachtig.

De Vèèrkàànte Viefkop.

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.