voor Holten, door Holten

Wat möj’ der met?

0

De algemene beschouwing’n bint achter de rugge. Twei daage is ter eproat. Het begun à good. Drei pertie’n gaff’n het kabinet op vuurhàànd à gen vertrouw’n meer. Det was in ieder geval duudelijk. Ôk de opiniepeilers gèèft gen ààndere ciefers te zeen, à zeet die der wà brôôd in. Mangs vroag ie of, woerumme of ter zukke keerls möt wèèn. Doar kump àllèène mà, nog meer onröste duur. Ongeveer tachtig precèènt van de Hollàànders zut het neet meer zitt’n met dit kabinet. Toch proat ze ôk disse wekke wier duur. À ‘k de geleerd’n magge gelèum’n bint alle kiezers domme lèu. Det zal wà. Mà hoe vaake heur j’ neet det de kiezers altied geliek hebt. Woerumme trekt disse kiezers de hàànne der van of? De eene helfte zwabbert noar hèèmoa links en de ààndere helfte noar rechts en det hef de politiek oaver zichzelf of e reup’n. Mekaa in de verkiezing’n ofslach’n en doarnoa, at de stemm’n van hèèmoa rechts en links noa rechts en links bint e goane, (VVD en PvdA) biej mekaar in berre kroep’n en de verkiezingsbeloftes oaverboord gôôi’n, um toch mar op het pluus te könn’n bliem’n zitt’n. Det geet dan ôônder het mom van ne grôôte starke coalitie, mà het is völle meer, bange weer, det de linker of de rechter kàànte het toorntje zôl oavernemm’n.

Biej de kiezers is det drek à neet good e völl’n en het getuugt van wichterwark, aj’in disse moeilijke tied, de zaak dan neet zôdeuinig oftimmert, daj’ ôk in de èèrste kamer het vuur ‘t zegg’n hebt. Het is a goane zô as ‘t e goane is. Zô makkelijk is het neet, mà toch, àj’ de kiezers wat beloafd, meugt ze der toch vanuut goan dàj’ der oe een betje an hôôlt en gen verbàànd angoat met pertiën diet veer van oe of stoat. Doarduur kriej’ det de kiezers biej buskes eur heil äns ààns zeukt. Met piene in de bokse blieft ze duur goan, umdet er ààns verkiezing’n komt en, zô as ‘t noe lik, de beire pertiën wordt weg e vaagt. Dan geet ôôns làànd noar de Filistijn’n heur ‘k schreeuw’n. en ôk det zee ‘k neet gebuur’n. Nee, iedere kèèr zal de wal het schip wier kèèr’n. Politici könt good weer of verkèèrd, mà de Hollàànders neet. Die zeet hèèl gauw det er wat verkèèrd zit, ààns zörgt de opiniepeilers der wà vuur. In Amerika bint ze nog völle better gangs. Doar zit ze mekaar het blood ôônder de nèègels weg te haal’n en stuurt ze zô mar een miljoen mèèns’n noar huus umdet ze der neet uut bint e kömm’n. Een grof schandaal. Det mag hier neet gebuur’n. Hier lôôpt er à völs te völle biej de duure. Loaw we met mekaa hopp’n det ze in ‘n Haag spiekers met köppe sloat en ààns möwwe mà zô gauw mèuglijk wier noar de stembusse. Det möw we in meert  ‘t oop’n joar toch à. Wis en waarachtig.

De Vèèrkàànte Viefkop.

WAARDEER JE DIT ARTIKEL?

Deel dit artikel dan met je vrienden!
Wanneer je actief deelt zul je dit bericht minder vaak zien!
close-link