voor Holten, door Holten

Van alle markten thuus

Gert Jan van de Weuste, hij wont in Markel, mà doar stroomt nog Hoolter blood duur ziene aadern. Neet dat det het belangriekste is, nee hij zörgt er vuur det ne hôôp lèu uut het Oaveriesselse, mar ôk veer doar buut’n, völle schik an ‘m belèèft. Hij is ter grèuts op det e uut Markel kump en det mag ôk. Hij zet Markel op de kaarte, saam’n met de Badmusse en Benny Muziekdèuze. Sinds een joar of wat zingt e neet allèène in het Brookduo, nee zie rèist ok nog langs de  kark’n in Twèènte, Sallàànd en ‘n Achterhook. Hij vertelt dan zien eeg’n geschrèèm’n verhaal’n en met zien moat Henny zingt ze alles an mekaa. Dit joar is e, op 11 december, in de karke van Hoolt’n te bewôôndern. Àj’ der nog hen wilt möj’ rap weer, want de kaartjes goat as warme brèudjes oaver de teunbàànke. Wat vertel ie mie noe, heij’ nog nôôit e heurt van die man? Hij hef nog wal in de gemeenteroad van Markel e zett’n. Het was mar èèm’n of hij zat as Gert Jan Oplaat, neuis Wilders, in de tweede kamer. Toen Wilders rechtsof sleug en vuur zich zelf begun is hij rechduur goane, trugge noar Markel. Det uutstapje noar ‘n Haag hef ‘m gen windeier e leg. Vuurzitter van de kamer van Kôôphààndel en sinds kort vuurzitter van de kipp’n vereniging “Nepluvi”. Sinds die tweede kamer periode is e trouwens oaveral vuur te vind’n. Al een joar of tiene trek e iedere twei joar, met vèèr buss’n volk achter zich an noar Ôôst’nriek. Toen ze vuur een joar of wat de Wierdense Revue niej lèèm’n in woll’n bloaz’n en ze nog een dom dèèr nèurig wadd’n, hoom’n ze neet lange te zeuk’n. Gert Jan was geknipt vuur Graads, den ôôld’n snooperd. De Weuste spölt die rolle zôônder meuite en met völle wille. Die machtige verhaal’n diet e in de karke vertelt, hef e noe vertaald in ‘t Hollàànds. De lèu diet ôônze moodertaal neet verstoat könt het noe allemoale lèèz’n in zien èèrste book, “Mirrewinter op het platteland”. Wèèst er rap biej want het löp as ne tierelier. Met dit book kump ter ne grôôt’n drèum vuur ‘m uut. Zô blif e gangs met zien geleefde Markel, mà neet minder met de regio. Woerumme zô völle ophef oaver ne Markelsen? Och, hij deelt de leefde vuur het plattelàànd en de leefde vuur de Canadeez’n met ôôns. Hij zingt oaver Mèister Koldewijn, zô as e wiej proat oaver Mèister Brouwer en Mèister Kroon. Mèister Brouwe diet ôôns leut zeen wat Sallanders of Tukkers wadd’n. Wat het allermèuiste is! Hij hef net as zô völle Markelsen al ziene wieshèid met e krèèg’n op de middelbare schoole in Hoolt’n. Die Hoolter schoole hef völle generaties ne hôôp wieshèid e brach. Àj’ doar vanof komt biej van alle markten thuus en köj’, net as Gert Jan Oplaat, alle kàànt’n op. Wis en waarachtig.
De Vèèrkàànte Viefkop.

Reacties zijn gesloten.