• Evenementen
  • Holtense Index
  • Smidsbelt webcam
  • Leven in Holten
  • Contact
  • Evenementen
  • Holtense Index
  • Smidsbelt webcam
  • Leven in Holten
  • Contact

Tweiduuzend een en twintig

Wiej bint de bochte duur. Een joar met wèinig piek’n en te völle deepe daal’n, lig achter ôôns. Een joar van te völle thuus zitt’n en alle oamde lustern noar de corona bericht’n. Net as of ter niks ààns meer was. Diegennegen diet in 2020 bint e blèèm’n zöw we in ôônze gedacht’n metnemm’n. Het bint er te völle, mà het lèèm’n geet onverbiddelijk vedan. Net op Ôôlejoarsdag raak’n Jan Wàànsink uut de tied. Jan van de Mölle, Jan van de Mengunie, Jan van de MAC. Ie kenn’n ‘m à vanof de lèègere schoole. Wiej drèèi’n ôônze naam’n umme en hij was Naj Knisnaw. Een lèèm’n làànk trek ie met mekaar op en dan, in één kèèr, is ’t vuurbiej. Wiej lèèft met, met alle femilies, diet neuist’n hebt mönn’n miss’n. Loaw we prebèèr’n van 2021 een mèuier joar te maak’n dan 2020. Het is nog altied ongewis, mà het lik ter op det de lèu de kômmende moand’n massaal in e èènt könt word’n. Gedeuld, mà met de hoppe det kômmenden zommer de terrass’n wier lös bint. Ôônze jeugd wier kan voetball’n of wat vun ne sport dan ôk. Lekker wier met zien all’n geniet’n van ne verjeuirdag of de Kèunefeest’n. Eindelijk is wier zôônder zörgen op vakààntie. Lekker is een kèèr wier knuffeln met de neust’n. Wiej hebt het àmoal zô emist. Tweiduuzend één en twintig, het joar van de bevrijding van det akelige coronavirus. Loaw we ’t hopp’n. Op zes januari bint de inèènting’n begunn’n en noe mà hopp’n, hoe meer èènting’n, hoe minder besmetting’n. Gedeuld, het is nog mà moeilijk op te breng’n en toch, hôôld vol. In de zeek’nhuuze drèèit ze nog altied oaveruur’n. Wiej bint de bôchte duur, de daag’n begint te leng’n, de midwinterheurns hangt an de spieker. Winter heiw we nog neet ech ehad. Wie wèèt is ter wat ôônderweg. Tweiduuzend een en twintig, lekker pooldern duur de schnèè, môôi op àànderhalven meter ofstàànd, op weg noar völle geluk in dit nieje joar. De carnaval zal nog wà net te vrog kômm’n, mà wiej könt er neet op wacht’n, um HMV wier in het darp te zeen bloaz’n. Lustern noar de zangkoor’n, diet her en der stoat te zing’n. Optreed’ns in het kutuurhuus, het kan neet rap genog goan. Loat tweiduuzend een en twintig mà kômm’n. Wiej bint er hèèmoa kloar vuur. Vuur àmoa, völle geluk en zèèg’n in t nieje joar,

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom terug!

Log hieronder in op je account

Maak een nieuw account aan

Vul onderstaande gegevens in voor je account

Achterhaal je wachtwoord

Geef je gebruikersnaam of email adres in om je wachtwoord te resetten.