• Leven in Holten
  • Contact
  • Leven in Holten
  • Contact

Tour de Frààns

0
GEDEELD

Het is wier zô veer, de Ronde van Fràànkriek is begunn’n. Net as zô völle lèu bin ‘k ter hèèmoa gek van. Van jongs of an biw we der met op e greuit, de tour de Frààns. Ie zölt het neet gelèum’n, mà ôôit hè ‘k zelf met e rèèdne in de ronde. Wiej wadd’n nog mà opschötteling’n, een joar of twaalme. vèèrtiene. De grôôte keerls rèèd’n ôôns vaake minuut’n op achterstàànd. Det kon ôk neet ààns. Wiej dèud’n met an de tour de Holt’n op ne gewoone jongsfietse, zôônder versnelling. Of en touw haw we de mazzel, daw we in het peleton in Hoolt’n an kwamm’n. Hèèl bezunder, ie veul’n oe as Wout Wagtmans, Wim van Est of Charly Gaulle. Het Hoolter volk stun, rieg’n dikke, te wach’n an de finish. Vaake was het ààns. Vanuut Èènter wörd’n wiej lös e loat’n. Binn’n de körtste kèèr’n was het peleton uut zich en rèè we met een man of wat, mooderziel allèène, wier op Hoolt’n an. Lèu met onvergettelijke naam’n as Vöske, de Blonde en Hölzenbein. Ôônderweg kekke wiej op de padd’nsteule, hoe veer of het nog was noar Hoolt’n. Wie traind’n der ôk nog vuur. Biej ’n Noordpool gung het de Loarnseweg op tut biej Nös Jehan, doar rechsof en dan oaver ’n Darperdiek wier op Hoolt’n an. Net biej de finish, neuis de iesbaane, kwam ôôns Hendrik Krieger intèèg’n met de stôtkoare. Hij kon of wol neet an de kàànte. Zô stèuve wiej der an alle kàànt’n umme hen en tèèg’nan. De helfte kon met ne kapotte fietse op huus an. Gert van ’n Bos hat er mà wier wark met. Ôk de kràànte wörd’n van A tut Z noar e pluust. Alle stukskes wörd’n uut e knipt en in ôônze sloapkamer, van tweie biej tweie, met plestiekbàànd an de muure plakt. As de tour vuurbiej was, zat de kamer hèèmoa dicht e plakt met kràànt’npepier en kenn’n wiej de verslaag’n uut ’n kop. Alle daag’n hönge wiej biej Jan Cottaar an de radio um mà niks te miss’n van det grôôte spektakel doar in Fràànkriek. Toen Jan Jansen in 1968 Herman van Springel op ’n allerlest’n dag uut den gell’n trui rèèd, gung hèèl Hollàànd uut zien dak. Zelf zat ik in de kazerne te wach’n op niejs uut het Midd’n Ôôst’n, umdet ze ’t doar met mekaar an ’n stok hadd’n. Wiej wadd’n de zörg’n èèm’n vergett’n toen we op een klein scharm kônn’n zeen det Jan Jansen op de schoolders gung. Onvergettelijk. Sinds 1977 is ter in Hoolt’n ne tourvuurspelling, èèrs van Chris en de Kuule en sinds een joar of wat van de drei Plint’n. Het geet wier onmeunig spannend word’n. Contador, noa twei etappes al op àànderhalve menuute. Wie wint het Hoolter toerspel? Alles is wier in e vult. Wie geet er striek’n met ’n gell’n trui en de eeuwige roem. Oaver drei wekke dan wèète wiej meer, wis en waarachtig.

De Vèèrkàànte Viefkop

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.