Stress stress stress en ongedeuld

Ie hebt ’t amoa wal is met emaakt. Oe lèèmtje kabbelt röstig veerder, mà dan in één kèèr gebuurd er vanalles. Ie möt vuur de èèrste keer noar schoole. Moo löt oe allèène achter en de juffe löp met oe an de hàànd, de nieje wereld in. De waterlàànders kômt as ie nog ne kèèr achterumme kiekt en zwaait. Een niej lèèm’n begint. Doar zölt nog völle van zukke ôôg’nblikk’n kômm’n. Vlak vuur oen eindexaam’n zit ie oe of te vroag’n, zô ‘k het wà könn’n? De twiefel slöt touw. Röstig bliem’n. Oavertuugd wèèr van oen zelf en het geet een stuk better. Ie leert er met umme goan, mà zô of en touw slöt het keihard touw. Het begint met het schriem’n van een stukske vuur de kràànte. Joar’nlàànk geet het vanzelf, mà dan krig de computer kuur’n en köj’ het verhaal neet verstuur’n. Vertwiefeld pak ie de laptop um toch mà det stukskse weg te krieg’n. Mooders is bèèzig met de vakààntie en wil onmeunig veer weg, terwijl ze alle oamde op tied noar berre geet um te röst’n. Noa völle hen en wier gedoon is det erèègelt. Ne môôie röstige reize. Een belletje an de garage, de auto is apk ekuurt, mà zal toch ne gepepperde reparatie mönn’n ôôndergoan. Het möt mà gebuur’n. De makelaar kump vuur nen ofspraak um het huus van oen zwoager te taxèèr’n. Oh ja det huus möt ôk nog leuig word’n ehaald. Woer möw we toch hen met al det spul. Belt den ofvoerkeerl ôk nog, ow we èèm’n könt kômm’n . Det kan der ôk nog wà biej. De computer is stark verooldert, doar kump nen niej’n vuur, det is ne zörg minder, allèène zöw we èèrs wal an mekaar mönn’n wenn’n. Det geet à zô moeilijk met de laptop. Ja nen echt’n held biej der neet in. Het is neet ààns. Hoedeuinig sloaj’ det op. Möw we nog wier ne computercursus goan doon? Gelukkig zie gèèft oe alle metwarking. Oh noe möt het verhaaltje ôk nog de dag eerder. De wekker vrog zett’n ààns heij’ de makelaar vuur de duure stoan. As het àmoa mà lukt. Gelukkig is ter nog èène dent neet kan sloap’n. Hij advisèèrt, röstig bliem’n en dèènk’n in oplössing’n. Det dooj’ dan mà. As noe alles mà wil op de laptop en het verhaal op tied is vuur de kràànte. Èèm’n tuss’nduur prebèèr’n, het lukt. Röstig bliem’n. Met een betje geluk kump de nieje computer hèèl rap. Gen geouwehoer meer met verstuur’n of virussen. Gen lèu meer, diet miej zegt, dàj’ neet verstuurd hebt. Het verhaal steet op ’t pepier, noe nog èèm’n zeen det het weg kump. Stress stress stress en ongedeuld.