Zôl der schnèè kômm’n met de Karsdaag’n, In het làànd woew’ bint geboor’n?
In het làànd van ôônze oolders, ’t Dörpske, met zien ôôlen toor’n.
Gelukkig heww’ der vaake wille, Ôk al is ter mangs vedreet.
Bint er altied nog de noabers, Diet met oe deelt, in lief en leed.
Zôl der schnèè kômm’n met de Karsdaag’n? Keerskes kiek’n met vaa en moo.
Op Karsoamd, de jongs gedèènk’n, Is het minste wàj’ könt doon.
Vuur vriejheid vöch’n ze, in weer in wi-nd. Vuur ôons, noe rost ze, kôôld as ies.
Gen warmte meer, mar eeuwig duuster, Zie betaal’n de hèugste pries.
Zôl der schnèè kômm’n met de Karsdaag’n? Joa, Karsoamd is neet meer veer.
Maakt gauw nog gladdigheid um ’t huus hen, Vuur det Derk kump met de Beer.
Hij zwarft nog altied langs de wèège, Duur dikk’n dààmp, op duustre daag’n.
Zelfs ôôld Mieneke is bange, Àj’ good könt lustern, heur j’ eur klaag’n.
Zôl der Schnèè kômm’n met de Karsdaag’n? Kiekt good of ter alle klôômpe stoat.
Hôôld de wichter binn’n de duure, Want hij nèèimp met, wà j’ slingern loat.
À j’ good lustert, kö j’ ’m heur’n, Tuss’n gier’n duur, van de wi-nd
Mà goa j’ stillekes buut’n kiek’n, Dèènkt dan neet dà j’ ’m ôôit vi-ndt.
Zôl der schnèè kômm’n met de Karsdaag’n? Gen mèènse diej’ nog buut’n zeet.
Karsoamd, worste pannekooke, Ôôle gebruuk’n, verget ze neet.
Binn’n brààndt de warme kachel, Wat smaakt de pannekooke good.
An de lôch doar steet ne sterre, Helder schienend, vol van glood.
Zôl der schnèè kômm’n met de Karsdaag’n? Met vaa en moo, vôt op de slèè.
Noar opoe hen, op schôôt biej opa, Op de klôômpe duur de schnèè.
Heur ie op oen duustre pad, Biej nach en ontied, een geroas.
Wèès ter op verdach, zèè opa, Det is wisse Hutt’nkloas.
Zôl der schnèè kômm’n met de Karsdaag’n? Neet zo vaake, wèinig kààns.
Karsfees, is vuur iedereene, In ’t buut’nlàànd is ’t ôk wal ààns.
Juus in disse dôônkre daage, Heur ie de Midwi-nterhoorn,
Roop’n um lech in disse wereld, Een Koningski-nd is ôôns geboor’n.
Zôl der schnèè kômm’n met de Karsdaag’n? Karsfees is toch völle meer.
Vuur alle lèu, op eeg’n wieze, Loat ’t vuur àmoal Karsfees weer.
In Hoolt’n, Riess’n of in Battum, Of nog völle veerder weg.
Belèèft toch àmoa die geboorte, Van det helder wiezend lech.
