Razzia

0

Het is wier röstig in Hoolt’n. De carnavalsklàànk’n bint vervleuig’n oaver ’n Hoolterbarg. Àj’ buut’n lôôpt dèènk ie biej tied en wiele det het vuurjoar is. Toch is het of en touw nog smeerig kôôld. Ofgelôôp’n zundag zat ik wier mill’n in de opnames van de film “Mirrewinter”. Det wil zegg’n, ik môgge ’n hèèl’n dag touwkiek’n. ’S mäns um tien tien uur wà ‘k al e schminkt en toen wadd’n der à spöllers een paar uur gangs. Zô of en touw kwam de gruuwelijkhèid van ’n oorlog akelig dichte biej. Biej ne razzia in de karke, wörd’n de Jödd’n of evoert. De rilling’n lôôpt oe oaver de rugge, temeer umdàj’ zelf rôôndlôôpt met een hatstekke verkèèrd speeldje. Duutse suldoat’n warkt met völle umhaal oen filmzönne noar buut’n. Zôl ’t wal oaverlèèm’n? De lèu stoeft an alle kàànt’n de karke uut. Buut’n struukelt ze nog, zô vaste zit in de rolle. Zelf stoaj’ stief van schrik at ze oe uutscheelt vuur moordenaar en NSB-er. Nog deepe in gedach’n goaj’ op huus an. Biej het uutparkèèr’n raak ie hèèl lichte de bumper van ’n dôômie. Èèm’n een berichtje achterloat’n, zôl ’t wà lèèz’n, want hij is inmiddels dôôd eschött’n. Het is àmoa zô lèèm’nsech, ie hebt gewoon tied nèurig um terugge te kômm’n in de wereld van vandaage. Toch onmeunig môôi um met te maak’n. De opnames duurt nog ne moand en dan köj’ al die spöllers en figurant’n, halverwèège ’t joar, trugge zeen op het witte dook. Politiek, diet bevolkingsgroep’n achtersteld, het is nog van alledag. Zô of en touw, scheet de lèu ôk wal akelig veer duur. Ie magt oe näuwelijks meer verklèèd’n as nèger of as indiaane en ôk ôônze zeeheld’n komt er neet al te gunstig of. Vuurdàj’ der arg in hebt binj’ ne rascist. Gelukkig maw we in dit làànd kiez’n, wie en wat wiej wilt. Doarumme is het zô mooi, det in ôônze gemeente, met ziene uutgesprökk’n verschillende opvatting’n, der nen oamd is, dàj de Heer’n van de politiek könt anheur’n. Nèèng meert um acht uur bint alle acht pertiën van de partij. Dus Hoolter, àmoa noar ’t Kultuurhuus, het wördt er ôk nog gezellig. Ie könt vroag’n stell’n via [email protected] . Mà àj’ oen vroage leever ôôlderwets in de melkbusse gôôit, det kan ôk nog, op ’n oamd zelf. Neuist het politieke gebuur’n is ter ôk nog wat ôôlderwets Hoolt’ns vertier. Ie deent oe wal èèm’n op te gèèm’n via http://www.kulturhusholten.nl , want vol is vol. Wat klinkt det raar, mà het allerbelangriekste blif, dàj’ hen stemm’n goat. Iedere stemme telt in Hoolt’n dubbel zwoar met, wis en waarachtig.

Holtens weekoverzicht
Abonneer je op ons weekoverzicht en ontvang het laatste nieuws elke zaterdag rechtstreeks in je inbox
Je kunt uiteraard altijd weer afmelden!

Laat een antwoord achter

Uw e-mailadres wordt niet gepubliceerd.

Deze website gebruikt cookies om uw ervaring te verbeteren. AccepteerLees meer