Quizmis of Mirrewinter

Van de eene op de ààndere wekke zeej’ de wereld verààndern. ‘N zak van Sunterkloas wördt in ewisseld vuur dèuz’n vol met karsfeesrommelderieje. Sjonge jonge wat is ter in al die joar’n ne hôôp verzameld. Het is mà good det er of en touw ôk nog wat snèuvelt en uuteindelijk biej het ofval verzeild raakt. In één kèèr stoaj’ met ne paddestoolbal in de hàànne. Het kèèrs’nvet van vuur zèumtig joar zit er nog op. Wat zôl het môôi wèèr at e oe ziene geschiedenis kon vertell’n. Zundagmiddag, Karsfeest. In lange rieg’n wordt ie met de hèèle zundagsschoole of e voert noar de karke. Oh, wat ne wonderlijken môôi’n, grôôt’n Karsboôm. Vol verwôôndering bliej’ der noa kiek’n. De môôie verhaal’n vleegt an oe vuurbiej en dan, an ’t èine van de dienst, met zu’n onvergettelijk book “Oh die kwajongens toch”, op huus an. Ie komt tut oe zelf en kiekt kinderlijk verbaasd noar oen eeg’n karsbèumpke. Ja, noa ne middag hard wark’n is de kamer kloar vuur de Karsdaag’n en Ôôld en Niej. Och en àj’der dan ’s oamds zo biej zit en um oen hen kiekt, is het toch ôk wà wier vertrouwd, met de drei kabouters neuist oe, tèèg’n schorssteen. De kinder zölt er wier schik an hemm’n. Vaa en moo zit met de vingers in de oor’n van het oervalse geluud van den één’n schreeuwlillijk en opa zit stillekes in ’n stool te grinnikk’n. December, ne moand um tut stilstàànd te kômm’n. Een paar daage um biej te kômm’n van al die uur’n voetbal. Ne tied um nog èèm’n achterumme te kiek’n. Dèènkend an den paddestoolbal in det bèumpke, lang lange elèène. Zundagschool’n, verleed’n tied. Gelukkig köw we op vieftien december noar ne feestelijk’n dienst met het al um bekèènde Brookduo, met een niej verhaal, “Tweiduuster schavuit”. Nee, ie kriegt det beukske neet gratis met. Het dèu miej dèènk’n an det beukske war e wiej krèèg’n van de zundagsschoole. Den ôôld’n keerl den e ploagt wörd’n duur die börssels van jongs. Het maak’n deepe indruk. Ôônderuut ezakt, zeej op oen feesbeukske det er ne quiz is ewes. Det is iets van de tied van vandaage. Niks mis met, mà zelf hôôlt wiej het op Mirrewinter, de tied van het gedèènk’n van de jongs op ’n Barg, de tied van Karsmarkt’n, schnèè, warme zuukela, olieboll’n en den midwinterhoornbloazer doar mill’n op ‘n Beelt. Wie hebt het àmoal nog te gauwe. Geniet er van, want vuur dàj der arg in hebt biej de bôch duur en kôm ie met ne kater wier biej zinn’n.