Politiek is een hard vak

Zô sprök de börgemèister noa oflôôp van de tèènenkrommende discussie in de leste roadsvergadering. De köpkes stunn’n strak. Toch wadd’n ze àmoa tevrèène. Neet àmoa hadd’n ze krèèg’n wat ze geerne woll’n hemm’n. De mèèste punt’n op ‘n agenda wadd’n hamerstukk’n. Twei insprekkers over de openingstied’n, netuurlijk uut Hoolt’n, wörd’n an e heurt. De Hoolt’nse Handelsvereniging en de Cöop sprökk’n wal in, mar ie kônn’n oe ofvroag’n of ter noar elustert wörd’n. De CU en de SGP heurd’n de Hoolter an en de Hoolter zatt’n der machteloos biej te kiek’n. Twei vroag’n wadd’n der van D 66. Volgens bèire sprekkers wadd’n ze neet uut enèudigt vuur gesprekk’n oaver de zundagsopening. Dit wörd’n tèèg’n esprökk’n. De vergadering kabbeln veerder, oaver de stolpersteene in Riess’n.’N eenigsten dent doar ne vroage oaver had was wier D66. De wethoolder wol der neet op in goan, det wil zegg’n neet in disse vergadering. Kennelijk bint er achter de scharm’n dinge gebuurt diet de openbaarheid neet könt verdrèèg’n. De ààndere pertien hadd’n gen zin um zich der in te meng’n. Het gif wal een raar beeld, àj’ könt lèèz’n det de gemeente der nog neet riepe vuur is en det ze der in Hoolt’n à hôôge en brèèd ligt. Verstoppertje spöll’n hef weinig zin. Gewoon man en peerd neum’n en noabestoand’n gèèm’n wat ze geerne wilt. En toen kwam de zundagsopening. Het punt woet ne meerderheid van de gemeente, in min of meerdere moate, vuur was. Die meerderhèid is ter neet uut ekömm’n. Het blek det er oaver en wier bes wat of was kôônkelefoest, mà de kaart’n wadd’n eschud. De VVD en de SGP vund’n mekaa, dach’n ze, ôônder het genot van een stèèvig glèèske whisky. In de ôônderhààndeling’n wörd’n doar gebruuk van emaakt, wiej zölt het nôôit wèèt’n. Toch wörd’n der nog èèm’n wier met modder esmett’n. Notabene de CU haal’n uut noar de VVD. Het Judas verhaal gôôi’n ze veer van zich of. Beneed’n alle peil, mar ie könt oe ofvroag’n of zie det peil neet nog veerder noar beneed’n haal’n. Van alles kwam der vuurbiej. Roadsleed’n kekk’n mekaa an met gezicht’n diet op onweer stunn’n. De vergadering wörd’n stil eleg. De VVD was riepe vuur de slachbàànke, zô dagg’n de kenners. Het gung àmoa nog net good. Iedereene haal’n het èine van de vergadering. De VVD, de PvdA en D66 hadd’n een verzeukschrift in edeent, um het partijprogramma van het CDA, in Hoolt’n, zundags lös van ééne tut zesse, op te nemm’n in het coalitie akkoord. Het was verspilde meuite. Biej hèufdelijke stemming was ter gen ééne van Gemeente Belang en het CDA diet vuur stemm’n. De Hoolter pertiën hebt mekaa vuur de zôvölste kèèr neet könn’n vind’n. De kiezers, woej’ het toch uuteindelijk vuur doot stoat, wat dit punt angeet, met leuige hàànne. Wiej zölt het er met mönn’n doon en oaver vèèr joar zee we wà wier an. Àmoa gefilstèèrt en maakt er wat van. Politiek is een apart vak.