Ofscheid

Één kèèr is ’t de leste kèèr en zô is ‘t. Die gedacht’n zölt de leste wekk’n vaake duur ‘m hen weer’n egoane. Dôônderdagoamd gaf börgemèister Arco Hofland vuur de leste kèèr de slöttels van Hoolt’n-Riess’n of an Prins Plakkie van de Leggenbarg. Hij dèu det met völle plezèèr, want de slöttels blèèm’n op de Leggenbarg. Vuur ne bomvolle zaal wörd’n e vervolgens, vuur de leste kèèr, vief daage beneumd tut Opperkeun van Keunedarp. Saam’n met zien bienoa voltallige kabinet en de Road van elme, leut’n ze e op zoaterdag de optocht langs zich hen goan. Het grôôte geniet’n kon beginn’n toen, met de Brààndheultjes vuurop, de optocht oaver ’n Smisdbeelt trök. Zô te zeen is alles good verleup’n. De slöttels bint inmiddels wier veilig op het gemeentehuus. Twaalf en een half joar börgemeister van Riess’n Hoolt’n, het is neet niks. Doar is hèèl wat gebuurd in die tied. Kiek mar is op ’n Kol en de als mar uutdieënde niejbouw in de Haar. Het geet as ne film an oe vuurbiej. Zelf kwam ie ‘m neet zô vaake tèèg’n. Mèèstal wadd’n det de krint’n uut de pap. Lekker één keer per joar, met ne grôôte busse langs alle Poasvèur’n. Lekker ôônder het volk, geniet’n van det ôôle gebruuk. De Poasboake anstekk’n, het kan nog altied. Dit joar zöw we Arco doar as börgemèister goan miss’n. Het zal vanof noe börgemèister Jurgen van Houdt weer, diet die traditie hôôge heult. Det zal wis en waarachtig wal goan gebuur’n. Àj’ mill’n op ’n Hoolterbarg vief bunder hoolt meugt verbràànd’n en doarbiej àmoa redenen bedèènkt, dat det wà kan en mag en Poasvèur’n neet, heij’ der ech ééne hen waterdörs’n. Zô kômme wiej toch nog wier uut biej de stikstof en de onröste diet oaver ôôns môôie plattelàànd trek. De lààndelijke politiek kump hier op an. De zwiegende meerderhèid löt zich heur’n. Eene road börgemèister, at ze biej de boake met ne fakkel op oe an komt, neet schrikk’n. Ie bint de man diet de boake mag anstekk’n en veerder vuur de rest gebuurt er niks. Vaake biej’ te bange. ‘N vieftiend’n Meert, netuurlijk àmoa noar de stembusse, dan wèèt wiej hoe ’t de vlagge der biej häänk. Ôôndertuss’n heiw we dan vuurgood ofschèid e nömm’n van de ôole Börgemèister, mar Arco zöw we hoppelijk nog vaake tèèg’nkômm’n vuur ’n viskroam um, net as zô völle ààndern, op de markt een viske te pakk’n. Vandaage, 23 februari, nèimp e ofschèid. Namens alle mèins’n diet disse stukskes lèèst, Börgemèister bedàànkt vuur al het goeie. Wiej hopt oe nog vaake te zeen in ôôns geleefde Sallààndse Hoolt’n, det ôk oene stèè blif.