Malende

0

Het blif duurmaal’n. Al die wereldleiders vuurop in ’n optoch in Parijs. Doar zatt’n der ôk wat biej, diet het met de vriejheid van meningsuuting neet zô näuw nemt. Ie vroagt oe of woerumme of ze dan met leup’n? Loaw we der mà van uut goan, um metlèèm’n te betuug’n. Betrökk’nheid biej de lèu, diet in de ôôg’n van miljoen’n, de profeet hadd’n beledigd. Wiej könt er ôôns gen vuurstelling van maak’n hoe arg of moslims het vindt, daw we de profeet wier vief miljoen kèèr in de kràànte hebt e zat. Wat is det, meug’n zegg’n wàj’ wilt of uutlokk’n? Disse wekke zeej’ op de Russische tillevisie, in Tsjetsjenië de lèu doarumme massaal de stroate op goan. In Moskou mag det neet. Poetin hef de kràànt’n verbèudne um profeet’nfoto’s te plaats’n. Neet meer öllie op het vèur! Ofgelôôp’n zundag zag ie op tillevisie, in Buut’nhof vertell’n, dar e wiej ôk neet vriej uut goat. Het was wà duudelijk, det IS en Boko Haram gen lekkere jongs bint. Àj’ het internet oavervleegt en zeet wat die bèire machthebbers àmoa presteert hebt lôôpt oe de kôôle rilling’n oaver de hoed. Duuzenden slachtoffers, goodwillende lèu, diet onscheuldig, zô mà wordt of e slacht. Het maalt miej duur ’t hèufd. Heb ie de verzamelde wereldleiders en de Nederlàànders e zeene um het op te nemm’n vuur disse mèèns’n? De karke en de politiek is nog lange neet in de hèèle wereld e scheid’n. Te vaake wördt er politiek bedrèèm’n met ’n Biebel of de Koran in de hàànd. Het geet um mach en neet um religie, zô vertell’n ze in Buut’nhof. De trammelant in het Midd’n Ôôst’n zôl ôk kômm’n duurdet machthebbers in het verleed’n, zô mà grèènz’n hebt e trökk’n. Hèèle volk’n bint verdeeld oaver meerdere làànd’n. De probleem’n bint in honderden joar’n ontstoane en det wördt neet op e löst in één’n dag. Van bèire kàànt’n hebt machthebbers botter op het hèufd. Toch is ter volgens Buut’nhof mar ééne oplössing en det is proat’n. Àllèène met de geneumde pertiën völt neet te proat’n, dus zölt de hôôge Heer’n uut de hèèle wereld mekaa mönn’n vind’n, um tut nen oplössing te kômm’n. Twei Japanners stoat noe vuur eur dôôdvonnis, umdet Japan tèèg’n IS is. Hef det wat met de profeet te maak’n? Het blif mà maal’n. Ruslàànd helpt Nigeria met waap’ntuug, tèèg’n Boko Haram. De Westerse wereld helpt Irak en Syrie tèèg’n IS. Het blif mà maal’n. Hoe lange nog? Nederlààndse jongs zeet er brôôd in um met IS met te vecht’n. Bint er ôk Nederlàànders diet stillekes tèèg’n IS en Boko Haram vecht? Mag det wa? Het maalt mà duur, wat is wieshèid?  Jammer genog gebuurt er te wèinig en alle daag’n vleegt de honderden slachtoffers oaver ‘n beeldbuis. Het wördt hôôge tied det er ech e proat wördt tuss’n de machthebbers. Wiej proat wà, mà te vaake wördt er weg e kekk’n. Het blif moeilijk, mà det dagelijkse bloodvergeet’n, loat det astebleef ophôôld’n. Wis en waarachtig.
De Vèèrkàànte Viefkop.

Laat een antwoord achter

Uw e-mailadres wordt niet gepubliceerd.