voor Holten, door Holten

Malende

Heb ie det ôk, daj’ zit te prakkezèèr’n oaver vanalles en nog wat, wat zich in de wèèreld ofspölt. Van de wekke zat ik achter de geraniums te kiek’n wat er gebuur’n biej ôôns in ’n tuin. Twei kleine vlinderkes dèud’n niks ààns as um mekaa hen toll’n. Zie trökk’n zich van alle ellende hèèmoa niks an en hadd’n de grötste schik van de wèèreld. Zelf zit ie te prakkezèèr’n oaver alle naarigheid op dit ôôndermoanse. Anslaag’n in Instanboel, Bagdad en zelfs in Medina. Honderden dôôi’n. Moslims, diet mekaar ofslacht in de naam van… Àj’ het meugt gelèum’n àmoa de schuld van IS. Teglieke lèès ie det die op de leste been lôôpt. Zôl dan det geouwehoer ôk of weer’n e leup’n of zôl het dan nog völle arger word’n. Ne katte in ’t nöuwe maakt mangs rare sprunge. Àmoa dèènkt ze det ze geliek hebt. Is det het probleem van de mèèns’n? Zie dèènkt en zie dèènkt det ze geliek hebt. Zô lange àj’ doarbiej ’n àànder nog neet noar het hiernoamoals helpt, völt het nog wà met. Mà met ne zwarm helge biej’n wèèj’ nôôit wat er àmoa kan gebuur’n. Körter biej huus is het à neet völle ààns. Engelàànd is zô’n betje noar de filistijnen, àj het möt gelèum’n. Het pôônd is in mekaar e zakt en wier in de beene kömm’n. De neet stemmers lôôpt in gàànz’npas duur Lond’n en de Heer’n uut de politiek taait of. Nog körter biej huus is het stille wörd’n rôôndumme Oekraïne. Rutte zet noe Nederlàànd wier op de èèrste drei plaats’n. Wiej zölt het zeen. Hij is gen vuurzitter meer van Uuropa, mà hij hef al wal eerder dinge zeg, diet e neet noa is e kömm’n. Àj’ noar ’m lustert hef àllèène hij geliek. Buma wil ôôns wier in dienst hemm’n. Poetin hef de suldoat’n an de grèènze stoan en de Navo löt de spierball’n zeen en Uuropa? In Uuropa zeg Timmermans det de Engelsen der zô wier biej meugt at ze det wilt. Zôl Uuropa dan ôk is een kèèr een betje spierball’n könn’n loat’n zeen. Vôt met de verspilling, vôt met het Engelse pôônd, vôt met Straatsburg, vôt met al die vuurdeeltjes. Hoedeuinig wiej’ noe alle lèu wier op eene liene krieg’n, um vuur Uroopa te goan. Miene hasses kraakt an alle kàànt’n. Ie snapt het neet meer en met miej de helfte van alle Uropiaan’n. Rutte vindt het verschrikkelijk en hef het oaver spöllekes. Poetin snapt de Engelsen wà. Hèinig an kom ik wier uut den drèèikolk van gedach’n. Wiej, nietige stöfkes op weg noar de eeuwighèid. Wiej wordt met e voert in den drèèikolk van die beire vlinderkes, diet zich neet bewust bint van al die onzekere gedacht’n, diet miej bèèzig hôôlt. Àj’ kiekt noar de natuur is ter mar één weez’n dent iedere kèèr alles kapot prebeert te maak’n en den löp rôônd op twei beene en dech det e àllèène zelf geliek hef. Wis en waarachtig.
De Vèèrkàànte Viefkop.

WAARDEER JE DIT ARTIKEL?

Deel dit artikel dan met je vrienden!
Wanneer je actief deelt zul je dit bericht minder vaak zien!
close-link