Kieswiezer

0

 

Van de wekke is e kömm’n. Den Kieswiezer. Van männ’n hè ‘k ‘m uut prebèèrt. Ik schrök e miej een ongeluk. Loa ‘k noe uutkomm’n op de grötste pertieje van ôônze gemeente, de SGP. Dit kon neet woar weer. En dan goaj’zeuk’n. Wat hebt die keerls veràànderd, det ik in det plaatje passe. Doar zit ’m noe net de kloe. Àj’ alles met vuur of tèèg’n beantwoord kom ie in ne bepaald’n hook uut. Toch is het de meuite weert. Het breg oe langs ne hôôp ôônderwarp’n, hoej’ neet dagelijks biej stille stoat. Het breg oe in ne situatie woej’ diss’n groadmetter langs de latte van oe eeg’n pertieje könt legg’n. Uutèindelijk bepaal met oe rondje in het stemhôk oene stemme. Het blif moeilijk, màr ie hooft oe neet te schaam’n, àj’ biej nen ààndere pertieje uutkômt, umdaj’ oe zörg’n maakt oaver alle niejs en nepniejs. Det is van alle tied’n, doar bin ‘k wal achter e kömm’n.

Miene gedach’n vleuig’n noar ne tied van misschien wà zestig joar trugge. De plakaat’n vuur de verkiezing’n zag ie oaverà in Hoolt’n. Ik slingern op mien fietske oaver de Grèèntweg, Hoolt’n uut. Net vuurbiej Bôlink Bets stun e lèèm’nsgrôôt in de wèire, professor Oud. Met duurdring’nde ôôg’n kek e miej an. Stemt VVD. Die zwart-wit prèènte is miej altied biej e blèèm’n. Um mien gehèug’n een betje op te friss’n, hè ‘k ‘m is èèm’n noa etrökk’n op het internet. Neet te lange en neet te gedetaillèèrd. Één dinge völ miej op en det gif hoppe vuur iedereene, diet duur den stemwiezer van tèèg’nswoorig an het twiefeln kump. Professor Oud is in zien lèèm’n oaver e goane van de Partij van de Arbeid noar de VVD. Zo zeej’ mà dàj’ oe näns oaver hooft te vewôôndern, het drèèj’n of biejdrèèj’n is van alle tied’n.

Trugge noar de tied van vandaage. Ie wordt dôôd e gôôit met het dagelijkse niejs. Nemt noe Amerika, zaak’n woet tut vuurig joar neet oaver e proat wörd’n, kômt noe van die kàànte oavervleeg’n. Wiej stoat àmoa vuuran um der ne mèining oaver te hemm’n. Een làànd met meer dan dreihonderd miljoen inwonners stemt democratisch, in één kèèr hèèl ààns dan verwacht. Een làànd, zô grôôt, det ne hôôp van die lèu, näuwelijks weet woet Nederlàànd lig. Een làànd met meer verbörg’n armood as daj’ arg in hebt. Een làànd det de president kan tèèg’n hôôld’n at e zich neet an de rèègels heult. Det làànd wördt noe good op e schudt en de hèèle wereld veult det. Het zal her en der in de wereld veulbaar bliem’n, mà de soep wordt nôôit zô heete gett’n as det e wördt op e deend.

In ôôns làànd met achtentwintig pertiën zal het neet ààns weer. Straks, noa de verkiezing’n möw we àmoa wier met mekaa vedan. Één dinge steet as ne poal boam’n water, goat astebleef hen stemm’n, want ààns möj’ de môônd wier vèèr joar dichte hôôld’n, wis en waarachtig.

De Vèèrkàànte Viefkop.

Misschien ook leuk

WAARDEER JE DIT ARTIKEL?

Deel dit artikel dan met je vrienden!
Wanneer je actief deelt zul je dit bericht minder vaak zien!
close-link