voor Holten, door Holten

Kèunefeest nog altied beeregezellig…

0

Netuurlijk geet iedereene doar hen. Köj’ oe vuurstell’n det er ne tied is e wes zôônder Kèunefees? De jonge lèu in ieder geval neet. Dit joar is het à wier twintig joar e lèène det het èèrste feest in de steigers stun. Drei joar was ter oaver vergaderd en ouwehoerd en toen môs ’t gebuur’n. Det èèrste fees met op de vriejdagoamd, Gert en en Hermien Timmermans, mar ôk Harm uut Riess’n, Gait uut ’t Klooster en Hiddink en Schreurs. Wat dach ie van op de zoaterdagoamd, John Spencer en Piet Veerman. Netuurlijk mag hier Roelf Jan Wamelink neet vergett’n word’n. In zien eentje zunge, as Pavarottie, de tèènte plat. Wat zôl der van den keerl trechte weer’n e kömm’n? Wat dach ie van den grôôt’n optoch met stroatmuzikàànt’n? Woet den golfoorlog à neet good vuur was! Bloaskapell’nfestival met de Mexicaantjes en de Brààndheultjes, met as èèrste winnaar, La bella bock uut Albarg’n. Woer blif de tied.

In de lôôp van de joar’n is ’t àllèène mà mèuier e wörd’n, met een programma vuur jôônk en ôôld. Tèèg’nswoorig begint het feest vuur de schoolwichter al op dôônderdagmiddag en op dôônderdagoamd nemt de allerjongste jeugd het vuurtöuw met Moniek Smit, de zuster van, juus ja,….Jan. Loaw we hopp’n det het gen besmettelijke zeekte is. De vriejdagoamd en de zoaterdagoamd, dan is het grôôt fees vuur ôônze jonge lèu. Netuurlijk lôôpt er ôk nog wal een paar verdwaalde zèumtigers en tachtigers tuss’n, mà die köj op de vingers van ééne hàànd tell’n. De familiefeest’n bint op de zoaterdag- en de zundagmiddag. Zoaterdagmänn’n is ter vuur de èèrste kèèr, Kèunescheet’n op ne Korhaan’n. Wie zôl det bedach hemm’n. Één dinge steet as ne poal boam’n water, de Korhaan’n loat zich de tèènte neet uutscheet’n. Zoaterdagmiddag trekt de Hoolter Korhaan’n van leer met, as één van de hèugtepunt’n, de Korhanen-palingsound, saam’n met Vool’ndam artieste Tamara Pol. De Hoolter Korhaan’n hebt de zoaterdagmiddag volwass’n e maakt. Nieje nummera as, Halélujah en leve de lol zölt zoatermiddag duur de tèènte galm’n. Ie zeet, vuur iedereene is ter wal wat biej. Het is één van de wèinige kèèr’n daj’, korhaan Tôône uut Splôô, as sprekstalmèister, an ’t wark könt zee. Zörgt er vuur daj’ dit zangspektakel, met de Roalter Jongs, het Noll’nkoor, de Hoolterdèèrns en de Reeperbahner uut ’n Diekerhook neet mist. En aj’ dan zundagmänn’n wier lekker uut e sloap’n bint, goaj’noar de grôôte finale. Zörgt daj op tied bint, want Bonny en Bôh foi toch, bint er op tied biej. Op het allerèèrste Kèunefees klunk op de zundagmiddag as leste, Het Sallààndlied. Het gaf een geveul van, daw we met mekaar iets vuur mekaa hadd’n e stot. Zô gauw aj’ zundagmiddag die klàànk’n wier heurt, wördt het tied um de kökk’n wier op te zeuk’n. Netuurlijk köj ôônderweg de leste munt’n nog opmaak’n. Toch zit het er dan wier op, de Hoolter Kèunefeest’n, een begrip in de regio en à twintig joar beeregezellig. Wis en waarachtig.

De Vèèrkàànte Viefkop.

Laat een antwoord achter

Uw e-mailadres wordt niet gepubliceerd.