• Holtense Index
  • Smidsbelt webcam
  • Leven in Holten
  • Contact
  • Holtense Index
  • Smidsbelt webcam
  • Leven in Holten
  • Contact

Karmse

De vakàànties bint begunn’n. Völle darper bint er op uut etrökk’n. Het kan àmoa wier. Noe riedt ze in de file op weg noar het Zuud’n of stoat ze in ne lange riege biej Schiphol. De vrogge vôôgels zeukt à daag’nlàànk noar de koffers. Doar bint ôk nog verstàànnige lèu. Die blieft lekker biej de duure. Zô gek is det neet, want de kommende wekke is ter karmse in ’t darp. Gelukkig bint er ne hôôp vakààntiegangers neer estrekk’n in ’t darp. Die könt, met det häänneke vol Hoolter, geniet’n van de drèèimölle en de botsautoos. Karmse, het is van alle tied’n. Ne grôôte karmse is ter in Hoolt’n nôôit ech ewes. In de vroggere joar’n môs Hoolt’n het doon met de Meimarkt. Det was een fees met ne drèèimölle en ne snoepkroam en natuurlijk ne beeste- en vark’nsmarkt. Vanuut de hèèle umgèèving kwamm’n de boer’n kiek’n noar de kèune in de benne. Vuur de wichter was het bingo. Opa stun tuss’n de vark’nkôôpleu en die gaff’n oe umslieks een dubbeltje vuur de drèèimölle of ne zuurstok. De grötste drôkte was biej Kalfstermans Mans in ’t Café. Doar kwam oe de lôch van beestestrôônt en verschroald bier intèèg’n. Doar wörd’n de kôôp beklunk’n en ’s oamds was ter dààns’n vuur de grôôt’n. Het blèèf kleinschalig. Iedere buurtschap had en hef zien eeg’n feest. Àmoal onmeunig gezellig, met een eeg’n karakter. Diekerhook, in de tèènte bie ‘t Bôônte Peerd, Splôô, in het wiedse boer’nlàànd, net as in ’n Bèusebarg. Zô is ter iedere wekke wal argens een feesje vuur al die vrèimd’n diet vakààntie hôôlt in die machtige umgèèving rondum Hoolt’n. In het vèère verleed’n wadd’n der ôk nog karms’n biej ’n Dikk’n Steen en op ’n Kroep’nkààmp, mà die bint, met het vedwien’n van de uutspanning’n, diet er biej lèèg’n, verleurne goan. Gelukkig heiw we der wal wat vuur trugge krèèg’n. Het grôôte gebuur’n steet à zo wier vuur de duure. De Kèunefeesten, zo rôônd tien september. Vèèr daage feest in de tèènte op de Kalfstermansweire. Dan is het hèèle darp trugge van vakààntie en kump jôônk en ôôld noar het centrum um te geniet’n. Vuurig joar was het nog behelp’n met coronacontroles an de poorte. Dit joar zal het vuur het èèrs in lange tied wier ôôlderwets gezellig word’n in en rôôndum de tèènte. Èèrst noe de vakààntie. Geniet er van. Ie hooft er gen spiet van te hemm’n, dàj’ neet vôt goat, doar is in Hoolt’n genog te doon. Broesend Hoolt’n, lekker met zun ne gell’n rakker in de voest op het terras.

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.