Judas, Janus en de Aldi

In en in verdreetig. De Hoolter hadd’n het zô good edoane biej de verkiezing. Vuur de allerèèrste kèèr meer opkomst as in Riess’n. Het CDA môs ne zetel inlèèver’n, um hun dappere stààndpunt oaver de winkelsluuting. Gemeentebelang wun, duur de Hoolter, ne zetel. Het volk gaf an det er ne meerderheid was vuur winkels lös in de gemeente. Democratie. De SGP en de Christenunie köj’ niks verwiet’n, zie wadd’n en blieft tèèg’n. Mà het dut zeer te mönn’n constatèèr’n det Judas biej het CDA zit en det Gemeentebelang ne pertieje is met ne Januskop. Zie hebt eur kiezers een rad vuur de ôôg’n edrèèit. Bèire pertiën bint duur de kneene egoane um mar op het pluche te zitt’n. Gen ruggegroat, zelfs de winkels in Hoolt’n möt op zundag dichte bliem’n. Aarige keerls, mà neet te vertrouw’n, zô blik, àj’ der op stemt en noe begint ze ôk nog te zwarte Piet’n. Waardeloos, het is gen wôônder det de politiek meer en meer ofglid. De kômmende wekk’n zöw we wà wier van alle verhaal’n te heur’n krieg’n. Zie doot mà, vuur èèrst biw we der wà kloar met. Één dingk is môôi, zie zölt ôôns der alle wekke an herinnern, daw we op zundag de bosschôpp’n möt haal’n in Battum of in Markel. Doar is trouwens niks mis met. Rèègelmoatig kôm ie de Hoolter doar noe ôk à tèèg’n. Genog ter oaver. Zie könt wier vèèr joar làànk lintjes knipp’n en zalvende woord’n sprekk’n, mar ôôit kump de ofrekkening. Of de Hoolter stemt massaal ààns, of zie goat nôôit wier.
Wiej goat nôôit wier, det dach ik, toen wiej vriejdagmänn’n um tien uur al in de file stunn’n. De nieje winkel van de Aldi was net wier lös. De èèrste vèèrhonderd klàànt’n krèèg’n ne bosschôpp’ntasse en een kraslot woer altied pries op völ. De winkel is môôi ewörd’n, alhoewel met al det volk, konj’ der eigelijk neet alles van bekiek’n. Halverwèège de winkel stunne wiej al in de file, vuur de kassa. Het personeel vuurzag ôôns van cake en gerèusterd brôôd. Det was àmoa good erèègeld. Wiej hebt er wal een half uur stoan wacht’n. De verwiet’n gung’n à gauw oaver en wier. Ik stun in de riege en de vrouwe haal’n, her en der, de benèudigde bosschôpp’n. Eindelijk was e wiej an de buurte. De kassa stun rôôd gleunig en met man en mach hölp’n ze met inpakk’n. Zie drukk’n miej een kraslot in de hàànne. Hèinig an kwam de pries noar boam’n. Honderd en vieftig Euro, vergett’n was het lange wacht’n. Het wörd’n um ereup’n in de winkel, iedereene kon met geniet’n. De vrouwe noa miej, gung met ne buul vol donuts op huus an. Verschil möt er weer. Buut’n heiw we nog een toetje noar binn’n ewarkt en toen kôw we op huus an. Netuurlijk volgende wekke wier noar de Aldi, mà hoppelijk neet wier een half uur in de file.

1 reactie
  1. Jans Slotboom
    Jans Slotboom zegt

    Goed gezegd! 👍

Laat een antwoord achter

Uw e-mailadres wordt niet gepubliceerd.