voor Holten, door Holten

Hoolt’n vuur een klèine honderd joar trugge (1)

0

Vuur miej hè ‘k een beukske van mèister A.J. Goldstein. Hij zag in die tied à hoe môôi of Hoolt’n was. Hij beschrif het zô duudelijk, dàj’ oe noe nog wà ne vuurstelling van het lààndelijke, röstige, schôône Hoolt’n könt maak’n. Het vrèandelijke darp lig an de spoorliene van Dèimter noar Almelôô, op ne kruussing van rieks- en provinciale wèège, in ne holte tuss’n ’n Hoolterbarg en de Zoerbarg. Vandoar de naam Holten. Een àànder verhaal uut de môônd van de ôôle lèu is, det er vrogger ne kèèr onmeunig völle wind is e wes. Het dikke hoolt lèè in de richting van Hoolt’n en het dunne hoolt, de rieze, in de richting van Riess’n. Àj’ oaver de grôôte weg, vanof Dèimter, komt zeej’ links vuur oe, de môôie begreuide helling van ’n Hoolterbarg. In duuzenden kluur’n greun schöt e noar boam’n, met hèèmoa boam’nop, het huus van de börgemèister, Huize de Bergh. De grôôte weg kump uut biej de grôôte poorte. Doar vormt e, met de Roalterweg en de oplôôpende Forthaarsweg, een schilderachtig pleintje. Op de achtergrôônd, de op verschillende hèugtes ligg’nde huuze, met doarachter de mölle van Wàànsink. Ôônder de poorte duur klimpt de weg het darp in. An bèire kàànt’n, wonning’n, deepe in ’t greun, met rechts het opvallende ôôle gemeentehuus, de Denneboom, woet ôk het postketoor in zat. Het nieje gemeentehuus steet veerderop, mill’n in Darp. Het is in 1906 ebouwd en hef een bezunder gèèveltje. Boam’nin het gemeentewaap’n, met an de linker kàànte, Maria met kind en an de ààndere kàànte, drei varkensköppe. Maria gif an det Hoolt’n vrogger heur’n biej het Bisdom van Utrech en de varkens wiest op de kèunehààndel en mesterieje, diet hier op was e bleuit. Veerder is ter oaver Hoolt’n neet zô völle te vertell’n. Ja netuurlijk, den grôôt’n bràànd van 1829. Het hèèle darp, 52 huuze, 17 schuur’n, de karke, ’n toor’n en de schoole, alles was in een paar uur tieds in de asse leg. In de vuurgèèvel van hotel Müller köj’ het lèèzn’op ne gedèènksteen. Het is grôôt’n armood in Hoolt’n. “Hoolt’n det arme làànd, drei kèèr verzöppen en vèèr kèèr verbràànd.” Pas 11 joar noa de bràànd höng’n der wier klokk’n in ’n toor’n. De karke van Hoolt’n was ne dochter van den van Riess’n en gewiejd an St. Dionysius. Neuis het gemeentehuus steet de fiene karke, den ebouwd is in 1878. In 1921 bouw’n de jödd’n de synagoge, vlak biej ’n Smidsbeelt. Veerder hef het darp nen oop’nbare en ne fiene schoole. Doarneuis twei botterfabriek’n, de Coop. Stoomzuuvelfebriek “De Vrijheid” en de Stoomzuuvelfebriek “De Eendracht”. De direkties wilt de vrèimd’n met plezèèr ne rondleiding gèèm’n, um is te bekiek’n wat de boer’nbevolking àmoa zô à dut. Het biej mekaa komm’n van al die wèèg’n gif of en touw ne gezellige drôkte, doar woer de weg zich splitst, net buut’n het darp, richting Riess’n en Markel. Doar lag vrogger de Waardenborch. (Wördt vervolgd)

Laat een antwoord achter

Uw e-mailadres wordt niet gepubliceerd.