Hoolt’n op zien smalst?

Zie wadd’n op de goeie weg, de VVD en Gemeentebelang hadd’n de liest’n verbund’n. Mà ja zô iets kan ààns uutpakk’n as daj’ verwacht. Vuur Gemeentebelang pakk’n het good uut en vuur de VVD wat minder. De Christelijke pertiën, in Hoolt’n good vuur meer stemm’n dan de VVD, hadd’n de grötste Hoolter pertieje neet nèurig um te bestuur’n. Det ze det toch hebt e doane, siert eur. Det Gemeentebelang zien zin neet krig in drei wethoolders, det is sloek’n, mà ie möt wa hèèmaol duur de aap’n besnuffelt weer, àj’ doarumme neet met zôll’n doon. Doar bint op zô völle gebied’n zaak’n te doon en doar steet de kômm’nde vèèr joar wier ne hôôp te gebuur’n. Met dit nieje bestuur zit dikke 60 precèènt van de Hoolter kiezers in het college en neet det het veerder wat uutmaakt, wiej hebt wier twei Hoolter wethoolders. Wiej goat trugge noar ôôle tied’n, alle wekke ne wethoolder biej ’n viskroam. Ie zölt zeen, de roadsvergadering’n goat er better duur verlôôp’n. Nee, alle gekhèid op ’n stökske, ie könt as oppositie de teleurstelling ofwèènteln op ’n àànder en det politiek neum’n. Ie möt oe ofvroag’n wàj’ der met opscheet. De kiezers hebt e sprökk’n en weert noe eerlijke, iedere ààndere pertieje had ôk ja e zeg tèèg’n disse coalitie en ôk die hadd’n bepaalde zaak’n in mönn’n lèèvern. Wie möt as Hoolter tevrèèd’n weer en met mekaa wier vedan. Oen stemme loat’n heur’n at nèurig is en neet nèuzeln oaver klèinigheed’n.
De roadsleed’n wadd’n vuur ne wekke of wat al in e zweur’n. Ôk doar nieje jonge gezich’n. Herman Klein Velderman trèèdt in de vootspoor’n van zien opa en dan maj’ verwach’n det e neet vèèr joar, as nen olifant, duur porseleinkaste struint. Zô of en touw mag det um de lèu wakker te hôôld’n. Hèèl verrass’nd wörd’n Elsbeth Deijk in de road e kèuz’n. Zô zeej mà wier wat vukke krach of de stemm’n van de jonge lèu hebt. Zie is klein van stuk, doar lik ze met op één van eur vuurvaadren, Binn’n Jan, de klepperman.At ze net zô actief is as det kleine männeke op klôômp’n, meuge wiej nog hèèl wat van eur verwach’n. Al met al hef de gemeente vuur disse periode vèèr Hoolter roadslèèd’n. Frans Noorddam en Henk Nijkamp maakt het Hoolter kwartet compleet. Loaw we hopp’n det ze in alle röste eur wark könt doon en det ze mekaa neet de vlôôi’n of vangt. Duur det Gemeentebelang ne wethoolder lèèvert, bint de roadsleed’n in één kèèr àmoal afkomstig uut Riess;n en det vuur een min of meer Hoolt’nse pertië. Mà zô kan ’t goan, ne klèinighèid hôôl ie altied. De ofgelôôp’n vèèr joar is ter völle gebuurt in Hoolt’n. Loaw we mar is kiek’n woet zich det vuur de kômm’nde joar’n veerder ontwikkeld. Oaver vèèr joar dan maw we wier en zô lange möw we disse lèu de kààns gèèm’n um de zaak’n vuur ôôns te rèègeln. Wis en waarachtig.
De Vèèrkàànte Viefkop.