• Leven in Holten
  • Contact
  • Leven in Holten
  • Contact

Hèèl stillekes vuurbiej egoane

9
GEDEELD

Meert is in ‘t làànd. Acht februari 1921, oprichting van de Hooltense voetbal in de bakkerieje van Wàànsink. Wat een grôôt feest had mönn’n word’n is zô mar an ôôns vuurbiej eglèène. Wat haw we nog èèm’n wier könn’n bekvecht’n of het noe 1921 was of 1922. Trugge in de tied, 8 februari 1972, het vieftig joarig bestoan van de voetbal. Is het dan toch 1922? Willem Beijers leut zien gezag geeld’n en toen het bestuur opniejs noar de notaris môs, is rech edoane an zien oordeel. Zô haw we in 1976 het viem’nvieftig joarig bestoan. Van HVC noar SV en wier trugge noar VV. Holten. Doar lig zô völle geschiedenis. In die beginjoar’n, keerls as Willem Beijers en Ome Derk Wàànsink. Zie zatt’n biej Rinus “Knoert” den Heijer in studio B te kiek’n noar hun jongs. Hoolt’n berucht en beroemd, ôôit, vuur ’n oorlog uut de competitie ehaalt , deur nen onrechtmatigen spöller op te stell’n. De desbetreffende spöller, neet te gelèum’n de opa van ôônzen vuurzitter, Jan Oolbekkink, wörd’n lèèm’nslàànk eschorst. Vuurzitters as Ome Willem te Veele, deZuurtjesdokter, Herman Klein Velderman, de Smid van de Kol en Jan Warrink, de Vèèdokter, gung’n Robert Oolbekkink vuur, biej disse môôie club. Bezundere tied’n, met bezundere spöllers as Jààns’n van ’n Schell’n Dekker. Allemachtig wat kon die man voetball’n. Hij had de beene zô lös an de hoed zitt’n, het lek wal elastiek. En det àmoal in het Sportdal, woet in de kleedkamer, oe het zàànd tuss’n de tèène blèèf zitt’n. Woer wiej alle daag’n te vind’n wadd’n um een partiejke te spöll’n. Van ‘n één’n op ’n aàndern dag zag ie doar een klein stammig krulleköpke, minstens vief joar junger asse wiej. Het was de leste kèèr det e het leste wörd’n ekèuz’n. André Dekker, de zönne van de postdirekteur. Hij leut ôôns links en rechts stoan met ziene snelheid en schijnbeweging’n. Doar zôw we joar’n later nog völle schik an belèèm’n. Bezundere spöllers, àj’ naam’n neumt verget ie der altied wat. Onvergettelijk, Frits Paule, gimmestiekleraar an de Ulo. Hij voetball’n biej De Graafschap. Wiej kekk’n hôôge tèèng’n ‘m op. Loepzuuver gaf e Jehan van Harwich de balle op de stropdasse en dan was het vaake raak. Het is te völle um op te neum’n, mà de kampioenswedtried in 1978 tèèg’n Sallandia mag neet vergett’n word’n. Gert van Fenna op de schoolders biej Sallandia. Het goold’n koppel Dekker-Bronsvoord brach ôôns det glorieuze kampioensschap. Hoolten noar de dèirde klasse, met een onmeunig môôi kampioensfeest in de kantine. Det kampioensfeest wördt, in 2022, de stippe op de horizon vuur ôôns vlaggeschip en alle supporters. Hoolt’n opniejs kampioen van de vèèrde klasse. Wis en waarachtig

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.