• Leven in Holten
  • Contact
  • Leven in Holten
  • Contact

Half vol, half leuig

5
GEDEELD

Wiej meugt wier vanalles. Toch hef de leste àànderhalf joar ziene spoor’n achter eloat’n. Was het neet duur de corona, dan wal op nen ààndere meniere. Mangs kriej’ het geveul det Magere Hein biej oe op de bagagedrèèger zit. As ne koppel wildebeest’n fietst’n wiej, achter Rutte an, het woeste water in. An de ààndere kàànte an ekömm’n, mark ie, det neet iedereene der meer is. Zô mà vôt, zôônder ofscheid. Gelukkig, ofschèid nemm’n kan dan nog wà, mà met een knikje op ofstàànd, heij’ toch het geveul, dàj’ ze achterloat in die kolkende massa’s water. Gelukkig wordt de vuurschrift’n noe als mà soepelder. Gelukkig zee we wier mèèns’n in de stadions, mangs nog beparkt, mà zô hier en doar à wier hèèmoa vol. Voetbal is disse wekken het tèuverwoord. In één kèèr blif ter ne voetballer ligg’n. Voetbal wordt èèm’n hèèl arg klein. Magere Hein loert oaverà met. Gelukkig wadd’n z’m dit kèèr vuur. Het glas blèèf half vol. Dagenlàànk, drei wedstried’n en dan nog al det gelul der umme hen. Nederlàànd hef de èèrste wedstried ewunn’n, dus slöt det virus noe nog ongenadiger touw. Doar is gen ontkômm’n an en ie könt er oe neet tèèg’n loat’n inèènt’n. Tut het bittere èine drinke wiej den beker leuig. Nôh ja vuur de helfte van ôôns landje is het één grôôt feest. De ààndere helfte möt mà dèènk’n, niks duurt eeuwig. Het bittere èine kan tut in de finale vedan goan. Het is mà net an wat vunne kàànte àj’ stoat. De voetbalpoeltjes bint in evult, mà wiej bint er nog lange neet met trechte. Noa het voetball’n kump nog det ààndere fenomeen, de Tour de France. Wie geet er as snelste oaver al die hôôge barg’n? Parijs is nog veer, wie hef het glas half vol en wie hef de piepe leuig? Wiej goat het àmoa metmaak’n en dan, vuurdet de harfs begint, heiw we nog de Olympische Spelen en wie weet, ôônze Keunefeest’n. Ie zeet het, genog te doon, geniet van det halfvolle glas. Blieft metdoon en loat Magere Hein veer achter oen. Het weer warkt met, noa moand’n van keulte en rèèg’n, köw we noe geniet’n van tropische temperatuur’n. Vakààntie, wiej bint er an touw. Ie zeet de terrass’n al vol stroom’n. Heerlijk, bestelt op tied. Zörgt er vuur det het glas half vol blif en pas leuig is, àj’ noar huus goat.

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.