• Evenementen
  • Holtense IndexVernieuwd
  • Smidsbelt webcam
  • Leven in Holten
  • Contact
  • Evenementen
  • Holtense IndexVernieuwd
  • Smidsbelt webcam
  • Leven in Holten
  • Contact

Griep, Hakuna Matata

De griepgolf is nog neet op zien hèugtepunt, tenminste à’k het niejs magge gelèum’n. Zelf zit ik net een betje biej te kômm’n van van al det gerôchel en gehoos. Hèèmoal oaver is het nog neet, mà ja, ie wilt zô geerne wier vedan. Griep, het is mangs ongriepbaar. Àj’ ’s mäns uut berre wilt komm’n is ter nen onzichbare hàànd diet oe dut besluut’n um toch mar deepe ôônder de dekkens te bliem’n. Àj’ oe met de hàànne oaver ‘t hèufd striekt, doot oe de heure nog zeer. De hèèle medicijnkaste wördt e plundert en an e vult met vitamines en ààndere hulpmiddeln. Mien vaa zèèr altied, “Het is altied wal äns good vuur.” Het wil nog neet vlott’n. Mèu, mèu, mèu en dan val ie wier in sloap. In één kèèr kump die zwoare griep, diej’ ôôit hebt ehad in oen kinderjoar’n wier noar boam’n. Deepe weg ekröpp’n ôônder de stikdekk’, zeej’de jagende wolk’n duur een klein splèètje van de dekk’n oaver het smalle dakraam, boam’n oe, trekk’n. De slagrèèg’n slöt te pletter op vèinsterglas. De keulte trek ne kôôle rilling oaver oen kôôrsige lichaam. Moo breg oe slappe thèè met een beschuutje. Ie wilt niks leever dan sloap’n., mar iedere kèèr biej wier wakker noa de zôvölste hoosbujje. Toch mar èèm’n noar de pille, of zà ‘k oe een hoesdrankje haal’n. Umdaj’zelf ôk neet wèèt wat wiesheid is stem ie doar mà met in in. Het drankje helpt, mà lange neet genog en vuural neet rap genog. Àj’ ôônder de dekkens ligt, is ’t net of HMV wier ôôlderwets duur ’t darp hen geet. In één keer ne valse toone der tuss’n en ie hebt in de gaat’n, dàj’ zelf zô an ’t muziekmaak’n bint. Dan toch mar èèm’n noar de pille um ne bevestiging te haal’n, det veerder alles trechte is. Doarvuur bint ze der uutèindelijk, te lange duur lôôp’n, kan nog meer narighèid breng’n. Wat het ôk wördt, kommende wekke is het wier fees in ’t Darp. Zörgt er vuur dàj’ de viruss’n en àànder ongemaak vuurblieft. Geniet van het Kèunedarpse Carnaval. Geniet van de optocht, goat is kiek’n wat de jonge generatie der wier allemoa van hef e maakt. Ie möt mà zô rekk’n, volgende wekke is alles achter de rugge en köw we ôôns richt’n op de verkiezing’n vuur de Gemeenteroad in meert. Ie wèèt ‘t, doar völt wat te kiez’n, maakt van oen stemrech àmoa oen stemplich. Noa die verkiezing möw we met mekaa wier vèèr joar vedan. Noa de Carnaval köw we Prins Poemba, figuurlijk, biej het grof vuil zett’n, Hakuna Matata. Volgend joar is ter gewoon wier ne nieje Dorstluchtige Hoogheid en noa meert heiw we ne nieje Gemeenteroad, Hakuna Matata, hebt gen zörgen, mà zörgt dàj der van geniet. Wis en waarachtig,
De Vèèrkàànte Viefkop.

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom terug!

Log hieronder in op je account

Maak een nieuw account aan

Vul onderstaande gegevens in voor je account

Achterhaal je wachtwoord

Geef je gebruikersnaam of email adres in om je wachtwoord te resetten.