voor Holten, door Holten

Good e schött’n

0

Netuurlijk, ie könt er alle kàànt’n met op. Toen ‘k vanmänn’n wakker wörd’n en het kiekdèuske an zatte, ha ‘k ’t drek good e schött’n. Gadaffi zien ôônderkômm’n was kàànt an bölle ‘schött’n. Good e schött’n, dèènk ie biej oe zelf. Temeer aj’ heurt det den gastert à zô’n achtduuzend börgers de dôôd hef in e jach. Loa we hopp’n det al det gescheet rap oaver is, want zôôj’ àmoa vaste wà hebt e schött’n is het vandaage an ’n dag ééne grôôte scheeterieje in de Arabische wereld. Gelukkig is ter körter biej huus better niejs. Heij’ al e schött’n det het wark op ’n Beelt zô good as of is? Ofgelôôp’n wekke biw we wier ne hèèl’n èine op e schött’n. Ôônze kèune bint er wier. Dôônderdag bint ze op de plaatse ‘zet. Môôi biej mekaa, vuur op ’n Beelt, kiekt ze oe an, met ne blik van woerumme heij’ ôôns zô lange op e slött’n in Riess’n? Zie bint wal een betje verschött’n en een fuske strôô der ôônder zôl neet verkèèrd weer. Doar könt ôônze hangôôld’n wà vuur zörg’n, dan hebt ze meteen wat te doon. Loa we hopp’n det ze der noe wier hèèl lange meugt stoan. Een klein, mager, ôôld, ielig, gries keerltje dech doar hèèl ààns oaver. Volgens um stoat er binn’nkort allèène nog mà peute en hef de rest vuurgood de beene nömm’n. Het zal neet woar weer. Met zien all’n möw we de Kèune good in de smiez’n hôôl’n. Oh, ie zôll’n ’t hoaste vergett’n, doar steet ôk wier ne bàànke op ’n Beelt. Mà det völt tèèg’n, det is neet zun ne makkelijke bàànke den ter altied estoane hef. Dit is meer ne pienbàànke woej’ ’t onmeunig van in de rugge kriegt, vuur zô veer aj’ det nog neet hebt. Het lik ter op, det de hangôôld’n ’t hier met möt doon. Misschien hè ‘k het neet good e schött’n en komt de ôôle bàànk’n toch nog wier, teglieke met de pôômpe, want den is ôk nog neet wier boam’n water. Het zôl môôi weer, want het wördt wier môôi weer. Loa w’t ofwach’n. Hoej’ neet langer op hooft te wach’n? Nummer dreije. Mien nieje book “Goold’n Treuintjes” is uut e gèèm’n biej www.boekscout.nl. Of het môôi is e wörd’n? Netuurlijk! Diss’n is nog wier mèuier as ‘n  vuurigen. Môôie versjes en gedich’n, foto’s en verhaal’n, oaver vrogger en noe met, as rôôi’n droad, àmoa dinge diet de leste twei joar bint gebuurt. Het lig in de winkel biej Heusinkveld en het steet op de site biej Hoolt’ns Niejs en zelf hè ‘k ter ôk nog wal een paar op de plàànke ligg’n. Völle lèèsplezèèr. Met dit weer stop ie ‘m biej oe, lôôpt een èineke rôônd, èèm’n röstig lèèz’n op ’n bäänkske en dan schöt oe in één kèèr te binn’n, det ’t wier tied wördt vuur ’n tuin. Ie wèèt ‘t, nôôit e schött’n is altied mis, wis en waarachtig.

De Vèèrkàànte Viefkop.

Laat een antwoord achter

Uw e-mailadres wordt niet gepubliceerd.