• Evenementen
  • Holtense Index
  • Smidsbelt webcam
  • Leven in Holten
  • Contact
  • Evenementen
  • Holtense Index
  • Smidsbelt webcam
  • Leven in Holten
  • Contact

Gen foete meer weert

De school’n bint begunn’n. In grôôte koppels fietst de jeugd op de less’n an. Kiekt good uut, àj’ ze tèèg’n komt. In iedere koppel zit er wal een paar op de telefoon te loer’n, in plaats van op de weg. Het is trouw’ns à lange neet meer zô, det àllèene de jong’n det doot. Het is jammer genog het beeld van vandaage an ‘n dag. Kiekt mà noar Prinsjesdag. Àmoa foto’s van vroole met heute, van hier tut Tokio en àmoa loer’n noar det kiekdèuske. Lekker belangriek. In de tweede kamer is het à neet ààns. Één man zit te zwets’n in de ruumte en de regering of wat er nog van oaver is zit te piel’n met de ipad. Biej verjeuirdaag’n is het neet völle better. Het is de tied woerin wiej lèèft. De wichter duukt vanuut de schoole achter het tv scharm en spölt “fortnight”. Vanmänn’n vleuig miej ne knôôp van de bokse, eene met vèèr gèètjes. Met weemoed denk ie trugge an oen jonge tied. Wiej trökk’n moo de knèupe van de sloop’n en ôk van de lôômp’n wörd’n de knèupe vakkundig of e knipt. Die knèupe gung’n met noar schoole. Knèupke smiet’n biej de zelfdrinkers. Èèm’n later wàj’ an het kettingbrekk’n of oaverstekk’n. Het gung der mangs hard an touw. Geschrôônselde kneene kwamm’n nog al is vuur. Moo dèu der een stuk van een ôôld laak’n umme hen en dan ravott’n ie vedan. Wiej hadd’n gen ipad, wiej hadd’n thuus zelfs gen telefoon. Het water kwam uut de putte, àj ne pôômpe hadd’n wàj’ al een stuk niejmoodser. De ôôle lèu wadd’n altied drôk. Ie môgg’n bliej wèè àj’ neet hoom’n te help’n. Noa schooltied pakk’n ie ne tol. Auto’s wadd’n der neet zô völle, ie hadd’n alle ruumte op de greentweg. Tonnebàànd’n, gewoon met ne stok en een rad van de fietse en dan wiet ‘t hardste kon. Vaake trökke wiej ôôns trugge biej de Visker in ’n Beeld. Vlag veroovern, uur’n wàj’ der met gangs. Ne rôôi’n zakdook, van oen vaa, op ’n stok was de vlagge. Hutt’n bouw’n, her en der in det bos zat wal een gat van nen ôôle hutte. Noe lig den beelt der verloat’n biej. Doar wördt neet meer espölt. Den ôôlen beuk’n kent miej nog, Mien naam zal der ongetwiefeld nog vaag in stoan. Zô waw we in alle tied’n van het joar in bewèèging. In mei wadd’n de meikèèvers de klos. Massaal wörd’n ze vöng’n en vuur knèupe verkocht. Twintig boksen kôj der vuur vroag’n, mar op het lest’n wadd’n ze gen foete meer weert. ‘Soamds was ie bekof, mà hadd’n gen vèèrkàànte ôôg’n van het loer’n op den ipad.

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom terug!

Log hieronder in op je account

Maak een nieuw account aan

Vul onderstaande gegevens in voor je account

Achterhaal je wachtwoord

Geef je gebruikersnaam of email adres in om je wachtwoord te resetten.