• Leven in Holten
  • Contact
  • Leven in Holten
  • Contact

Fanfare of harmonie

1
GEDEELD

De midzommerfeest’n lig achter ôôns. Het zommer möt nog beginn’n. As dit ’n oftrap is vuur alles wat er nog steet te gebuur’n in Hoolt’n, hoow we ôôns neet te verveel’n. Wiej hebt rôônd könn’n lôôp’n in de joar’n vieftig. Ie kekk’n zô de huuskamer in en heur’n oaver de probleem’n diet de ôôle lèu met de jong’n hadd’n. Vandaage an ’n dag is ’t neet völle ààns. Àj’ der zô rôônd lôôpt kriej’ pas in de gaat’n, daj’ het zelf met hemm’n mött’n maak’n um der alles van te snapp’n. Één dinge snap ik noe nog neet. Ne kastelein, dent neet tapt en dan met zû’k môôi weer. Wie zagg’n ne kalverschetser. Het dèu miej dèènk’n an de tied det mien vaa de schets’n zelf wel is een betje biej wark’n, um biej het opgoan van de markt gen gelazer te krieg’n. Vuur de allerèèrste kèèr bin ‘k biej de barbier ôônder ’t mes e wes. Ik môs e wach’n op de buurte. Toch was het in de joar’n vieftig zô, det scheer’n vuur knipp’n gung. ‘N ôôld’n Drent had gen ne pruik op en hij was ôk neet kaal. Toen ‘k ‘m an de hèure trökke, bekenn’n e det e gen Drent heet’n. ‘N board hà ‘k ter of en ik kon netjes de karke in. Op zoaterdagmiddag de hèèle karke vol en doar kwam gen ne dôômie an te passe. De lèu genött’n en as ofsluuting van het gehèèl konn’n ze ’s oamds noar Fanfare. Hatstekke uutverkoch, 880 man op de tribune. Opniej gung e wiej trugge noar de joar’n vieftig. De fanfarewas an ’t oefen’n. In gedach’n zag ik ze wier, Ab Westerik en Bernard van ’n Tol, met die grôôte heurns en netuurlijk Ott’nherre met de pann’ndeksels. ‘T is wit en ie zeet ’t altied in Hoolt’n. “Goeie morgen Pimman” en ie wuss’n dàj’ wier ne dag veerder wadd’n. Ie kônn’n geniet’n van het gebeulder van Brinks en de helligheid van Kappert. Keundering met zien triangeltje was ’n eenigsten dent ech spöll’n op zien instrumèènt. Ie zölt mà zô’n hellig wief hemm’n as Aaltje! Henkie, de knech van Kappert maak’n met zien heult’n fluitje van de fanfare ne harmonie, hoewà det leste, veer te zeuk’n was. Een grôôt complimèènt vuur alle lèu diet zes oamde achter mekaa dit vuur het vootlech hebt e brach. Möj’ oe vuurstell’n, Gerard Voordes diet, zes oamde achter mekaa, zun ne onmeunigen smak van de waag’n maakt, zôônder iets te brekk’n. Det is meer dan klasse, det is ech grôôte kuns. Het zit er wier op. Wat steet ôôns àmoa nog te wach’n? Ne zuudelijken rôôndweg, het zal toch neet woar weer? Ie konn’n der op wach’n. Twei dôôie korhaan’n op ’n Hoolterbarg van twintigduuzend euro per stuk. Het is toch te gek um lös te lôôp’n! Op den zelm’n Hoolterbarg möt ze butje biej butje legg’n, het zal toch neet van die korhaan’n weer? Wis en waarachtig neet.

De Vèèrkàànte Viefkop.

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.