• Leven in Holten
  • Contact
  • Leven in Holten
  • Contact

En noe geet de Enkco vôt

26
GEDEELD

Jan kalfsterman, kieper en voetballer biej de Rôôd zwart’n. Hij was een vuurbeeld vuur ôôns. Duur de wekke stun e gewoon vlèis te verkôôp’n in ziene slagerieje biej de grôôte Poorte. An de achterkàànte van die slagerieje stun een paar jonge keerls wors te drèèj’n. Hèèl kleinschalig nog. De Encko was net geboor’n. In latere joar’n verhuusd’n ze noar de Waagweg, op de plaatse van het ôôle slachthuus. Het ôôle slachthuus, àj’ niejsgierig wadd’n kôj’zo met kiek’n, as ter wier ne kouw noar slachbàànke wörd’n elèid. Met de rèègelmoat van de klokke zag ie Broer van Sèèns met de melkbusse op het slachthuus angoan. Hij melk’n de beeste nog één kèèr vuurdet ze noar de eeuwige jachtveeld’n gung’n. Ôk Piep Jan zag ie in zien eeng’n tempo, op weg noar Udema. De wereld was nog neet zô geheuist as vandaage an ’n dag. De tied’n verààndern snel, het grôôte greui’n was begunn’n. Baas Jan wörd’n op evolgt duur echte direkteur’n en het bedrief wörd’n alsmà grötter. Bekèènd in hèèl Nederlàànd. Het was neet het enige bedrief in Hoolt’n wat alsmà grötter wörd’n. De Smid van de Kol greui’n uut tut Nido. Zie slökk’n de jutefebriek van ter Hörs der zô biej op. De plestiekfebriek krèèg wark vuur völle Hoolter femilies. Met Udema der biej was het Hooltense industriegebied op de Kol hatstekke vol. De plestiek zôl as èèrste noar de Haar goan. Twaalf bunder, het was te völle. Uuteindelijk vertrökk’n ze noar Goor. Gelukkig blèèf Nido in Hoolt’n. Duur alle verààndering’n is de industrie vertrökk’n van de Kol. Àllèène de Enkco zit er nog. De Enkco hef ne dochter van kunsvlèis, Vivera, ebaart en die zit al op de Vletgoarsmoat’n. Noa verlôôp zôl ze doar zelf ôk hen goan. Doar zal hèèl wat of eproat weer, mà noe geet, uuteindelijk, de ôôle Enkco neet noar Vletgoarsmoat’n, mar is het verkoch. Het is èèm’n sloek’n, mà zie maakt de weg vriej vuur nieje wonning’n. Zô geet de tied vedan. De verààndering’n op ’n Kol blieft rap goan. Àj’ der èèm’n neet ewes bint, ken ie het neet wier. Het ôôle darpse is vuurgood vôt, mar ôk disse tied breg ôôns völle môôis. De Encko geet Hoolt’n verloat’n, mar löt ôôns ne prachtige dochter noar. Een ieder möt het vuur zich zelf mar uutmaak’n, ne hamburger van de slager of een alternatiefje van dochter Vivera.

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.