Eindelijk wier ne vergadering

Netjes op tied bint ze begunn’n. Niks Hoolt’ns kwartèèrke. Netjes zit ze àmoa op àànderhalm’n meter. Doar steet neet völle op de agenda. Ne nieje ofdeling van de als mà greuiende carnavalsvereniging. Hoe zal die nieje ofdeling, van de bienoa stokôôle keerls van de Fienpreuvers, zich goan neum’n?.Noa een betje geharrewar oaver en wier bint ze der uut. Biej uutzundering mag ter ééne biej diet de zestig nog neet vuurbiej is. Zô hebt ze toch nog een langer bestoan vuur de boeg. Doot er nog mar eene in. De ôôle kastelein sloft noar de gelagkamer en èèm’n later kômt de môôi getapte biertjes binn’n. De vergadering verzààndt in nen uutwisseling van het leste niejs. Wille en verdreet wördt edeelt. Netuurlijk, verhaal’n oaver vrogger. Kniene frettèèr’n langs de spoorwal. Doar zatt’n der toch wal onmeunig völle. Klèine jongs diet de leuige fleskes bier, diet de suldoat’n uut de trein gôôid’n, verzamel’n en biej de Biester inlèèver’n vuur statiegeeld. Det wörd’n dan drek um ezet in ijs en chips. Het in de grôônd stopp’n van ofgewarkten öllie en àànder ongemak. Iets wat in diss’n tied neet meer vuur mèugelijk wördt eheul’n. De Rôôd Zwart’n spölt de kampioenswedstried dit joar met de carnaval. Netuurlijk kump de ongewèènste kôônt’nknieperieje ôk vuurbiej. De mèèst’n goat biej zichzelf te roade en beseft det ze misschien zelf ôk wal is iets oaver de liene bint egoane. Wat mag nog en wat kan neet, het is het grôôte vroagtèèk’n det boam’n Nederlàànd häenk. Ie heurt nog is wat op zunne ongedwung’n vergadering. Of het àmoa woar is, wiej wacht het of. Anne Marie wônn’n is verkoch an de Albert Heijn. Zie goat ne nôôdwinkel zett’n, achteran op de Liez’n en dan kump ter in het centrum ne complete nieje winkel, met huuze der boam’n. Huuze diet dan misschien wier völs te duur bint. Nee, doar komt ôk wonning’n vuur de jongeren en lèu met ne smalle portemonnee. De karke gôôit Irene der of en doar kômt betaalbare wonning’n. Zô wààndelt de vergadering het hèèle darp duur. Iedereene kik uut noar het zommercarnaval. Woer zal den slöttel word’n oaverhandigd an de Hoogheid. In het gemeentehuus is het eigenlijk völs te klein. Het duuzelt oe, alles krig ne buurte. Het internet, hoe môôi ôk, is toch wal een begin van völle kwoad. De kastelein dut er nog ééne in. Hij is al hèèl lange neet meer op ne vergadering ewes. De tied vlug vuurbiej. Netjes vuur tien uur wördt er of erekkent en goat de nieje leden van de Staat’n Generaal op huus an. Woenneer is de volgende vergadering? Doar kump bericht van via het internet.