Doar möj’ biej weer

Moandagmänn’n stun ik stille te kiek’n op ôônz’n Smidsbeelt. Het is röstig, met ne hàànd vol hangôôldern en vrèimd’n. De kômmende daag’n beloafd het môôi noazommerweer te word’n, met de mèuiste daag’n achter in de wekke. Neet dà ‘k oe doar garààntie vuur gèève, mà het wördt onmeunig môôi biej de “Kôm der is uut markt” op twei, drei en vèèr september. Netuurlijk hopt de organisatie det er völle volk kump. Hoe meer hoe mèuier. Zie hebt alles uut de kaste e trökk’n um vuur iedereene, van hèèle kleintjes tut hèèle ôôld’n, een machtig môôi programma in mekaar te drèèi’n. Vriejdagoamd kump ôônze jeugd volop an bod. Rawsome sloopt ‘n “toor’n” met rauwe beats, à vuurdet de Uutmarkt begint. Tèèg’nswoorig kriej’ ôk oaverà vergunning vuur. Zoaterdag kom ie oor’n en ôôg’n te kort, zô völle is ter te doon. Oaverà muziek, van Greun Lech biej’ ‘t Kèuntje tut HMV op ’n Smidsbeelt. Wat dèènk ie van een Spaans terras of de Kunsmark? Mill’n op ’n Beelt hebt ze ne toor’n e bouwt, met een kort optreed’n van de Vèèrkàànte Viefkop, mar ôk gevestigde artiest’n as Stammie en het Diekerhooks Amateur Toneel. De karke is ’n hèèl’n middag lös um te lustern noar zang en meziek. De toneelclubs COV en OCH nemt ôôns met in de wereld van Scrooge. Veerder könt de kinder met doon an sport vuur een gratis ijsje. De Hoolter sportclubs loat zich zô van de beste kàànte zeen. Doar kump ne spölleman uut Syrië, vuur daw we nog mar één’n vluchteling hebt e zeene. Kortumme, te völle um op te neum’n. Det is dan allèène nog mà de zoaterdag. Op zundag goat ze um kwart vuur twaalme à wier vedan met een koffieconcert en vanof half tweie zet Ruben Hanevelt en Ilse Bolink, van “Kroep-in”, ’n Smidsbeelt op zien’n kop. Dôômie Gijsen vertelt zien verhaal boam’n in den theatertoor’n, in plaatse vanof ’n prèèkstool. Det kan àmoal in Hoolt’n. Het gehèèl wördt van 16.00 uur tut 18.00 uur of e slött’n duur de Hanzestadband. Zörgt daj’ niks mist. Ie möt er het programma mar is biej pakk’n, zôdaj’zelf uut könt zeuk’n wàj’, vuur oezelf en de wichter, het mèuiste vindt. Môch ie zoaterdag zô of en touw geschreeuw heur’n, schrikt dan neet, det is femilie van Binn’n Jan, ‘n lest’n Klepperman van Hoolt’n. Hèèl stille stun ik doar mill’n op det grôôte plein, met mien’n klepper in de hàànd en ik dache, zà ‘k à vaste beginn’n. Ik heule miej in en genötte van de röste diet Binn’n Jan ôk möt hemm’n e had at e op ziene klumpkes oaver ’n Smidsbeeld hen kleppern. “Boeren, burgers en buut’nlèu, kômt het zeen kômt het zeen. Vriejdag, zoaterdag en zundag wördt het merakels gezellig in Hoolt’n. Zörgt dàj’der biej bint, zodàj’der oaver met könt proat’n.” Met ne grijns op het gezichte kröp ik in ’n auto. Ik heb ter zin in. Hoolter treft mekaa op ’n Smidsbeelt, wis en waarachtig.
De Vèèrkàànte Viefkop.

Misschien ook leuk

WAARDEER JE DIT ARTIKEL?

Deel dit artikel dan met je vrienden!
Wanneer je actief deelt zul je dit bericht minder vaak zien!
close-link