voor Holten, door Holten

Doar gebuurt wat!

0

Doar gebuurt zô völle, det het ôôngeluk op de Aalpolsweg de kràànte, normaal gesprökk’n, neet haalt. Ôk, oaver det deerntje, det mill’n op .n Smidsbeelt, duur een knipgat rit, zöj’ neet wat in de kràànte vind’n. Ja ech, doar zit noe al wier een grôôt gat op ‘n Beelt. Neet eerder, as det er eene de butte brekt, zöj’ der wat oaver lèèz’n. ‘N Smidsbeelt is môôi e wörd’n, àllèène ie zeet de lèu der wat verwèèst rôôndlôôp’n. Links en rechts schöt er nen auto vuurbiej. Ie zeet de lèu dèènk’n, wie hef ter noe vuurrang en woer mö’k hen. Hèèmoa, noet ôk de kruussing noar de Stationsstroate der uut lig. Het is doar één’n grôôt’n zààndbak. Gelukkig is den armood oaver ‘n paar wekke wier vuurbiej. Doar op ‘n vèèrsprôônk is niks meer oaver uut de tied van zestig joar trugge. De winkelduure van Dikkers op’n hook, met an de ààndere kàànte Schöppert. Doar tèèg’noaver het huus van Derks’n, half in de klimop, met op de ààndere kàànte, ôônder de hôôge bèume, het ôôlde huus van dokter Bessinkpas, woet mèister Brouwer wonn’n. Hèèl darps en vuural hèèl röstig. Op die kruussing, links de Grôôte stroate in, vun ik mien’n daaglijksen weg noar schoole. Een männeke, in een mesjesters jäske met ritssluuting, ‘n kraag’n noar binn’n e sloane, met doarôônder nen eengsgebrèid’n trui. Veerder ne pofbokse an, met ongelieke piep’n en ofgetrapte klôômp’n. Een klein vergeld fotootje, vuur het ôôlde doktershuus, breg miej in die ôôlde tied. Trugge noar ‘n dag van vandaage köj zeen det er vanalles gebuurt in Hoolt’n. Doar wördt regèèrt vanuut het Riessense. Neet lull’n mà poets’n. Jammer det den èèrst’n vrouwlijken liestrekker van de SGP uut Vlissing’n kump en neet uut Riess’n, mà wie wèèt stoat ze binn’n de kortste kèèr’n noe ôk in ôônze gemeente op de lieste. De tied, van de vrouwe heurt thuus achter ‘t fernuus, lig achter ôôns. Toch lôôp ik met een misselijk geveul rôônd. Die beestachtige beeld’n vanuut Syrië. Wichter diet oe met leuige ôôg’n ankiekt. Mèèns’n diet ligt te stoeptrekk’n en jungskes diet verwèèst rôôndlôôpt. Het stekt. Wie dut zukke dinge?! Het maakt gen bal uut wiet het dut! Het kan neet en het mag neet, doar möt wat gebuur’n en doar lig net die grôôte valkoele. Noe bint er à honderdduuzenden dôôi’n. Hoe völle wordt er det wà neet, as ter in wördt e grepp’n? Vuural at er hèèle massa’s bint diet het teeg’n wilt hôôld’n, in naam van ôônz’n leem’n Heer. Woer kenne wiej det van? Loaw we iedereene de krach en de wiesheid touw wèèns’n, um het juuste te doon. Wiej kiekt vanof het tèlèvisiescharm met en hoolt ôôns harte vaste. Doar möt wat gebuur’n, dit mag neet vedan goan. Het maakt doarbiej neet meer uut, wiet schuld hef an disse slachpertieje. As ter niks e doane wördt, gebuurt er nog völle meer. Het is duudelijk det in Syrië, lèu oaver de grèènze bint e goane, wis en waarachtig.

De Vèèrkàànte Viefkop.

WAARDEER JE DIT ARTIKEL?

Deel dit artikel dan met je vrienden!
Wanneer je actief deelt zul je dit bericht minder vaak zien!
close-link