• Leven in Holten
  • Contact
  • Leven in Holten
  • Contact

De X gif tweideling

3
GEDEELD

Hàj’ in vroggere tied’n geleerd’n en ongeletterden, noe in disse tied is het allèène mar arger ewörd’n. Grôôte deel’n, met naame de euldere generatie, wordt meer en meer buut’nspel ezet. De jong’n bint inmiddels in grôôt’n getale ôônder edökk’n in de digitale wereld. Ie magt oe ofvroag’n of ’t doar amoa better van wördt. Zelfs zaak’nlèu goat er in met. Zô stoaj’ vuur de viskroam en bestel ie oen wekkelijkse porsje vis. Niks an de hàànd, kump doar in één kèèr ne man vuur ’n kroam, den precies hetzelfde bestelt. Hij had op het feesboek ezeene, det er nen anbieding was. Drei euro gekôôper. Het ontlokt oe toch wà ne reaktie, van hoe kan det? Ja, det was allèène vuur leu diet angaff’n det ze det hadd’n ezeene op feesboek. Doar wörd’n meteen ezeg det er vuur lèu, diet digitaal analfabeet wadd’n, ne spoarkaarte was. Het zal wà, vuur wekk’n trugge was de bosschôp det de spoarkaart’n wadd’n ofeschaft. Gelukkig de woord’nwisseling wörd’n op elöst en diss’n digitaal’n analfabeet hef wier ne spoarkaarte. Biej noavroage blik dus det er meerdere zaak’nlèu verschil maakt tuss’n digitale en de ôôlderwetse reklames. Pas op, zôl mien advies wèèr, anbieding’n vuur iedereene, liek en rech. Noe is dit neet ’t enige, wat oe kan ploag’n. Det hèèle digitale gedoo, zörgt er vuur dàj’ oe völle vaaker argert. De bàànk’n, zô vertrouwd at ze eerder wadd’n, zo veer stoat ze noe van oe of. Àj’ belt, wôj’ op eschèèpt met ne wachttied van tien minuut’n. Àj’ proat met lèu, hebt ze mangs meer andach vuur det scharmke op de telefoon, dan vuur oe. Het persoonlijke kontakt geet meer en meer verleuirne. Het breg miej trugge biej de X. Het gif tweideling. Het is neet good. Alles wördt op esloane. Àj’ ne kèèr zeukt noar ne nieje kachel, heij’ ne wekke loater oen hèèle apparaat vol stoan met anbieding’n. De computer regèèrt oaver de lèu en det gif te dèènk’n. Möj’ oe vuurstell’n det er is twei wekke den stroom uutvalt, dan is Hollàànd in last. Het schient det de wichter noe völle slechter schrieft en rekkent dan vieftig joar trugge. Neet meer nèurig, zie könt het zô uutrekk’n op de telefoon. Zie hooft mar op ne knop te drukk’n en het opstel of de sprekbuurte wördt vuur eur uut eprint. De euldere generatie, en det bint er nog altied völle, kan doar slech in metkômm’n. Zelfs in de tweede Kamer zeej’ biej de debatt’n, 150 man, ôônderuutgezakt, koekeloer’n op de scharmkes. Zie lustert neet meer noa mekaa. Hoe veer zal dit nog goan. Hoe lange zörgt de onbekèènde X nog vuur tweideling

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.